Latviyada koronavirusga chalinish holatlari soni keskin ko‘paygani sababli 21 oktyabrdan 15 noyabrgacha lokdaun amal qiladi. Bu haqda mamlakat bosh vaziri Krishyanis Karinsh ma'lum qildi.

Avvalroq Latviya million aholiga kasallanish soni bo‘yicha dunyoda 1-o‘ringa chiqqani ma'lum qilingandi.

“Latviya kasallanish darajasi bo‘yicha dunyoda 1-o‘rinda. Juda ko‘p odam emlanmagan”, deb aytgan bosh vazir.

Lokdaun vaqtida mamlakatda soat 20dan 5gacha komendantlik soati amal qiladi. Ishga qatnovchilar bundan mustasno. Ishlab chiqarish, qurilish va iqtisodiyotning hayotiy muhim sohalarida ishlovchilarga ish joyida bo‘lishga ruxsat beriladi. Oziq-ovqat do‘konlari, minimarketlar, dorixona va uy hayvonlari uchun do‘konlardan tashqari barcha boshqa do‘konlar faoliyati to‘xtatiladi. 1 noyabrdan 1-3-sinflar o‘quvchilari maktabga qaytadi. 4-12-sinflar o‘quvchilari esa 1 noyabrdan 15 noyabrgacha masofadan o‘qiydi. Barcha ko‘ngilochar, sport va madaniy tadbirlar taqiqlanadi.

Karinshning ta'kidlashicha, ko‘rilgan choralar odamlar o‘rtasidagi aloqalarni kamida 40 foizga kamaytirishi kerak.  

Latviya hukumati ma'lumotlariga ko‘ra, oxirgi sutkada respublikada 1253 kishida koronavirus aniqlangan, 7 kishi virusdan vafot etgan. Aholisi 1,9 mln kishini tashkil qiluvchi Latviyada umumiy kasallanganlar soni 185 mingdan oshdi.