Ҳакерлар овозни клонлаштириш ёрдамида банкдан 35 миллион доллар ўғирлади

Жаҳон 08:57 / 19.10.2021 9049

Таъкидланишича, БААдаги банклардан бирининг бошқарувчиси телефонига қўнғироқ қилинган ва гўшакнинг нариги томонида банкнинг анча йиллик мижози овози янграган.

Мижоз ўз компанияси йирик шартнома тузгани ва шу сабабли банк унинг ҳисобрақамидан кўрсатилган ҳисобрақамга пулларни иложи борича тезроқ ўтказиб бериши кераклигини айтган. Банк бошқарувчисини янада ишонтириш учун унинг электрон почтасига битим ҳақида ҳуқуқшунос томонидан тасдиқланган ҳужжатлар юборилган.

Бошқарувчи мижознинг овозини яхши танигани учун ҳеч қандай иккиланишсиз пулларни айтилган ҳисобрақамга ўтказиб берган. Бироқ бир неча кундан кейин банкда алданганларини тушуниб етишган. Аниқланишича, жиноятчилар ўғриликни амалга оширишда овозни клонлаштириш технологиясидан фойдаланишган.

Тергов давомида мижознинг пуллари АҚШдаги бир нечта ҳисобрақамларига сочиб юборилгани аниқланган. Таъкидланишича, полицияга айни вақтда фақат шугина маълум.

Полициячиларнинг фикрича, жиноий схемага бутун дунё бўйлаб тарқалган камида 17 киши аралашган. Бу эса уларни излашни янада қийинлаштиради.

Кўпроқ янгиликлар