Хайрулло Бозоров Фарғона шаҳрида электромобиллар ишлаб чиқариш лойиҳасини амалга ошираётган “Central Asia Motors” корхонасида бўлиб, корхонани ишга тушириш билан боғлиқ жараёнлар билан танишди. Бу ҳақда вилоят ҳокимлиги ахборот хизмати маълум қилмоқда.

Фарғона механика заводи ҳудудида жойлашган ушбу корхонада умумий қиймати 50 миллион АҚШ доллари бўлган “Электромобиллар учун эҳтиёт қисмларни ишлаб чиқаришни ўзлаштириш ҳамда енгил ва юк электромобиллар ишлаб чиқариш” лойиҳаси ҳаётга татбиқ этилмоқда.

Жорий йилнинг декабрь ойида 4 та енгил ва 8 та юк электромобиллари тест режимида янги корхона конвейерларидан чиқади. Ҳозирги кунда жойларда электромобилларни қувватлантириш шохобчалари оммалашмаганини ҳисобга олган ҳолда, дастлабки босқичда гибрид қувватли (ток ва бензин) электромобиллар ишлаб чиқарилиб, бунда электр қуввати 20 фоиздан камайганда бензин двигатели ишга тушади ҳамда бензин билан ишлаш жараёнида электромобиль батареяси қувват олади.

Ҳозирда электромобилларни йиғиш ва тест ускуналаридан ўтказиш цехи ҳамда электрофорез ва бўяш цехи ишлаб чиқариш жараёнларига тайёр бўлиб, электромобилларнинг кузов қисмини пайвандлаш учун цех ташкил этишга қўшимча ишлаб чиқариш майдонига эҳтиёж борлиги масаласи вилоят ҳокимига билдирилган.

Босқичма-босқич амалга ошириладиган ва 2022 йилда якунланадиган лойиҳа натижасида 350 тадан ортиқ янги иш ўрни яратилади. Тўла қуввати билан ишга тушгач, корхонада йиллик 10 минг электромобиль ишлаб чиқарилади.