«Biz chet davlatlar uchun mutaxassislar tayyorlab berishni maqsad qilmaganmiz» - Shavkat Mirziyoyev 

“Mening saylovoldi dasturimda bu ko‘rsatkichni yaqin kelgusida 50 foizga yetkazish ko‘zda tutilgan. Bu o‘rinda mavjud oliy ta'lim muassasalarining asosiy qismi Toshkent shahrida joylashganini alohida ta'kidlash lozim.

Albatta, biz yoshlarimizga oliy ta'lim berishni kengaytirish maqsadida yana yangi oliy o‘quv maskanlarini tashkil qilamiz. Lekin, ularni bitirgan farzandlarimiz ertaga qayerdan ish topadi, degan hayotiy savol hammamizni o‘ylantirishi kerak. Bugungi shiddatli zamonda, global miqyosda raqobat kuchayib borayotgan murakkab vaziyatda yuksak intellektual salohiyatga ega kadrlarga hamma joyda ehtiyoj bor. 

Agar biz yoshlarimizga munosib daromadli, qulay sharoitli ish topib bera olmasak, ular chetdan bo‘ladigan takliflar haqida o‘ylaydi. Albatta, hozir hamma erkin, xohlagan mamlakatida ishlashi mumkin. Lekin men shu yurtning non-tuzini yeb, shu yerda kamol topgan har bir mutaxassis avvalo shu yurt manfaati uchun xizmat qilishini xohlardim. Chunki, biz chet davlatlar uchun mutaxassislar tayyorlab berishni maqsad qilmaganmiz. 

Biz yangi O‘zbekistonni, Uchinchi Renessansni xorijda emas, jonajon vatanimizda bunyod etmoqchimiz. Buning uchun har tomonlama kuchli mutaxassislarimizga, iqtidorli o‘g‘il-qizlarimizga ularning ehtiyoj va qiziqishlariga mos ish topib berishimiz, o‘z navbatida, ular o‘zlarining bor bilim va salohiyatini mamlakatimiz ravnaqi uchun sarflashi zarur. Shundagina, biz tashkil qilayotgan yangi institutlar, universitet va akademiyalar o‘zini oqlaydi”, dedi prezidentlikka nomzod.