Xitoy iyul oyida Financial Times gazetasi xabar berganidek gipertovushli raketa emas, kosmik qurilmani sinovdan o‘tkazgan, deb ma'lum qildi Xitoy tashqi ishlar vazirligi vakili Chjao Litszyan.

«U raketa emas, kosmik qurilma edi», – dedi u.

O‘tgan haftada Financial Times gazetasi o‘z manbalariga tayanib Xitoyning gipertovushi raketasi nishonni urishdan oldin butun sayyorani aylanib chiqqani haqida xabar bergandi.

Nashr manbalarining ta'kidlashicha, Xitoy Qo‘shma Shtatlar razvedkasini sarosimaga solib qo‘ygan ilg‘or kosmik salohiyatini namoyish etgan.

Ularning so‘zlariga ko‘ra, raketa nishondan atigi bir necha o‘n metr nariga tushgan.

Ekspertlarning fikricha, agar gipertovushli raketa Antarktida orqali parvoz qiladigan bo‘lsa, Xitoy AQShga raketaga qarshi mudofaa tizimi joylashtirilmagan janubiy yo‘nalish tomondan zarba berishi mumkin.