“Eshelon-2021”, “Qidiruv-2021” maxsus mashg‘ulotlari hamda “O‘zaro hamkorlik-2021” qo‘shma mashg‘ulotida 4 ming kishi va 500 dan ko‘proq texnika birligi ishtirok etadi. Mashg‘ulotlar Tojikistonning Momirak va Harbmaydon poligonlarida o‘tkaziladi”, deyilgan xabarda. 

Ta'kidlanishicha, “Eshelon” mashg‘ulotlarida qo‘shma amaliyotga tayyorgarlik ko‘rish va uni o‘tkazish davomida moddiy-texnik ta'minotni tashkillashtirish mashq qilinadi. “Qidiruv” maxsus mashg‘ulotlarida harbiy amaliyotni o‘tkazish uchun razvedka olib borish ko‘nikmalari sayqallanadi. “O‘zaro hamkorlik” mashg‘ulotlarida esa xalqaro terrorchi tashkilotlar jangarilarining KXShTga a'zo davlatlar hududiga kirishi bilan bog‘liq chegaraoldi qurolli ixtilofini bartaraf etish bo‘yicha qo‘shma amaliyot olib borish mashq qilinadi. 

“Jangovar birodarlik” doirasida o‘tkaziladigan har bir mashg‘ulotda KXShTga a'zo barcha 6 davlatning harbiy kontingentlari ishtirok etadi.

Avvalroq KXShTning birlashgan shtabi boshlig‘i general-polkovnik Anatoliy Sidorov “Jangovar birodarlik-2021” mashg‘ulotlarida 5 mingdan ko‘proq harbiy ishtirok etishini ma'lum qilgandi. Bundan tashqari, mashg‘ulotlarga 700 dan ko‘proq qurol, harbiy va maxsus texnika, jumladan 650 ta zirhli texnika, 20 tagacha samolyot, 20 tadan ko‘proq vertolyot va 15 ta uchuvchisiz parvoz qurilmasi jalb qilinadi.

Ayni vaqtda KXShTga 6 ta davlat – Armaniston, Belarus, Rossiya, Tojikiston, Qirg‘iziston va Qozog‘iston a'zo hisoblanadi.