Айрим шахсларга ер участкаларини аукцион орқали сотиб олиш харажатлари қисман қоплаб берилади

Ўзбекистон 08:29 / 18.10.2021 10447

Қарор лойиҳаси Ўзбекистон президентининг “Ер муносабатларида тенглик ва шаффофликни таъминлаш, ерга бўлган ҳуқуқларни ишончли ҳимоя қилиш ва уларни бозор активига айлантириш чора-тадбирлари тўғрисида”ги фармони ижросини таъминлаш ҳамда алоҳида тоифадаги фуқаролар томонидан якка тартибдаги уй-жой қуриш учун ер участкаларини сотиб олинишида ижтимоий қўллаб-қувватлаш тизимини янада яхшилаш мақсадида тайёрланган.

Қарор лойиҳаси алоҳида тоифадаги фуқаролар томонидан якка тартибдаги уй-жой қуриш учун ер участкаларини сотиб олинишида ижтимоий қўллаб-қувватлаш тартибини белгилайди. Қарор лойиҳаси 3 банддан, лойиҳага илова сифатида низом 11 банддан иборат ҳолда киритилмоқда.

Лойиҳада:

ҳарбий хизматдаги фаолияти пайтида ҳалок бўлган ҳарбий хизматчиларнинг оилалари, табиий ва техноген хусусиятли фавқулодда вазиятлар оқибатида турар жойини йўқотган жабрланган шахслар электрон онлайн-аукцион орқали сотиб олган ер участкасини тўлиқ ёки қисман қоплаш;

қоплаб бериш Қорақалпоғистон Республикаси республика бюджети, вилоятлар вилоят бюджетлари ва Тошкент шаҳар шаҳар бюджет ҳамда туман (шаҳар) бюджетлари даромадларининг прогноздан ошириб бажарилган қисми, маҳаллий ҳокимликлар тасарруфидаги ижтимоий жамғармалар (“Темир дафтар”га киритилган оилаларни қўллаб-қувватлаш чора-тадбирларини молиялаштириш манбалари, “Ёшлар дафтари” ва “Аёллар дафтари” жамғармалари) маблағлари, ҳомийлик маблағлари ва қонунчиликда таъқиқланмаган бошқа манбалар ҳисобидан амалга оширилиши кўрсатилган.

Билдирилишича, қарор лойиҳаси қабул қилиниши ушбу йўналишдаги ҳуқуқий асосларни тартибга солишга, шунингдек, алоҳида ижтимоий ҳимояга муҳтож аҳоли қатламини янада яхшилашга хизмат қилади.

Кўпроқ янгиликлар