Яшнобод туман Давлат хизматлари маркази янги бинода фаолият бошлади

Ўзбекистон 18:35 / 16.10.2021 2872

Яшнобод туман Давлат хизматлари маркази янги бинода фаолиятини бошлади. Давлат-хусусий шерикчилик шартлари асосида бунёд этилган ва замонавий IT-коммуникация технологиялари билан жиҳозланган бино қурилишида замонавий шаҳарсозлик нормаларига мувофиқлик ва фуқаролар учун қулай шароитларни яратишга алоҳида эътибор берилди.

Мурожаатчиларга бир вақтнинг ўзида 160 дан ортиқ турдаги хизматларни кўрсатиш имкони яратилди. Бу ерда электрон навбат тизими, ахборот киоскаси, электрон хизматлардан мустақил фойдаланиш мумкин. Ташриф буюрувчилар хизматлардан мустақил фойдаланишлари, шунингдек, турли имкониятлардан хабардор бўлишлари учун ахборот стендлари ва постерлар қўйилган. Бундан ташқари, саломатлик бурчаклари, болалар майдончаси ҳамда мини кутубхона ташкил қилинган.

Бу ерда бошқа ДХМлар каби аксарият давлат хизматларидан экстерриториал тамойили асосида, яъни яшаш ва турган жойдан қатъи назар фойдаланиш мумкин.

Электрон навбат тизими билан интеграция қилинган махсус платформа ёрдамида мижозлар хизмат кўрсатиш жараёни ва хизмат кўрсатган ходимни баҳолаши мумкин бўлади.  

Ташриф буюрувчиларнинг фикр-мулоҳазаларини инобатга олган ҳолда давлат хизматларидан фойдаланишда NFC қурилмаси ўрнатилди. Унинг ёрдамида ID картадаги фуқаронинг шахси аниқланади ва тизимда аризачининг маълумотлари автомат тарзда тўлдирилади.

Фуқароларнинг идорама-идора оворагарчиликларининг олдини олиш мақсадида бинога Президент Халқ қабулхонаси, Бош вазир қабулхонаси ҳамда ФҲДЁ бўлимлари жойлаштирилди.

Ҳозирда Тошкент шаҳрида 12 та давлат хизматлари маркази мавжуд бўлиб, уларнинг учтаси замонавий шарт-шароитларга эга.

Кўпроқ янгиликлар