Ҳиндистон элчихонаси 15 октябрдан бошлаб ўзбекистонликларга виза беришни тиклади

Ўзбекистон 18:30 / 16.10.2021 2542

Ҳиндистоннинг Тошкентдаги элчихонаси COVID-19 пандемияси билан боғлиқ вазият яхшилангани муносабати билан ўзбекистонликларга саёҳат визаларини бериш амалиёти тикланганини маълум қилди.

Қайд этилишича, 2021 йилнинг 15 октябридан саёҳат визалари билан (фақат гуруҳ бўлиб саёҳат қилувчилар) чартер рейслар орқали Ҳиндистонга бориш истагидаги барча хорижий мамлакатлар фуқароларининг мамлакатга киришига рухсат берилган.

Сайёҳлик мақсадида ташриф буюрмоқчи бўлган қолган барча хорижликларга 2021 йил 15 ноябрдан бошлаб сайёҳлик визаси билан Ҳиндистонга киришга рухсат берилади.

Ҳиндистоннинг Тошкентдаги элчихонасига кўра, ҳозирга қадар олинган сайёҳлик визаларининг амал қилиш муддати бекор қилинмоқда. Шу боис ушбу мамлакатга саёҳат қилмоқчи бўлган барча чет элликлардан, агар ҳали муддати тугамаган сайёҳлик визаларига эга эканликларидан қатъи назар, янги виза олишлари талаб этилади.

Таъкидаланишича, Ўзбекистоннинг барча фуқаролари ва Ўзбекистонда истиқомат қилувчи чет элликлар Ҳиндистоннинг Тошкентдаги элчихонасида юқоридаги тавсияларга мувофиқ туристик виза олиш учун ариза беришлари мумкин. Афғонистон фуқаролари учун ҳам виза бериш Ҳиндистон элчихонаси томонидан илгари эълон қилинган турли кўрсатмалар билан тартибга солинишда давом этмоқда.

Элчихона Ҳиндистонга ташриф буюрувчилар карантин чекловлари ва коронавирус пандемияси билан боғлиқ бошқа масалаларда Соғлиқни сақлаш ва оилавий фаровонлик вазирлигининг амалдаги кўрсатмаларига қатъий риоя қилишлари лозимлигини эслатган.

Кўпроқ янгиликлар