Қашқадарё вилояти Яккабоғ туманида «Жигули ВАЗ 2106» машинаси ва ов жиҳозларини ташлаб қочиб кетган ноқонуний овчилар топилиб чора кўрилган. Бу ҳақда вилоят Экология ва атроф-муҳитни муҳофаза қилиш бошқармаси ахборот хизмати хабар бермоқда.

Маълум қилинишича, Қашқадарё вилояти Экология бошқармаси Яккабоғ тумани назорат инспекцияси инспекторлари ҳамда туман ИИБ ЖҚБ ходимлари билан ҳамкорликда туманнинг «Самоқ» ҳамда «Турон» МФЙидан оқиб ўтган Қизилдарё дарёси ҳудудида тунда экологик назорат рейд тадбири ўтказилган.

Рейд давомида бир гуруҳ фуқаролар ноқонуний равишда балиқ овлаётгани аниқланган. Инспекторларни кўрган ноқонуний овчилар «Жигули ВАЗ 2106» машинаси ва ов анжомларини ташлаб қочиб кетган.

Қайд этилишича, экология ҳамда Яккабоғ туман 19-сонли ИИБ инспекторлари томонидан суриштирув ишлари олиб борилган ва ҳуқуқбузарликни содир этган фуқароларнинг шахсига аниқлик киритилган.

Таъкидланишича, ҳуқуқбузарлик 3 нафар фуқаро томонидан амалга оширилган. Ҳолат юзасидан фуқароларга нисбатан Маъмурий жавобгарлик тўғрисидаги кодекснинг 90-моддаси 1-қисми билан маъмурий баённома расмийлаштирилган. Уларга 4 миллион 50 минг сўм жарима ҳамда табиатга етказган зарари 4 миллион 536 минг сўм этиб белгиланган.