Норвегияда камон ва ўқлар билан қуролланган шахс беш кишини ўлдирди

Жаҳон 11:15 / 14.10.2021 11425

Полиция хабарига кўра, маҳаллий вақт билан соат 18:13да Кунгсберг шаҳри марказида қуролланган шахс ҳаракатланаётгани тўғрисида бир неча хабар келиб тушган. Кейинроқ маълум бўлишича, у ёй ва ўқлар билан қуролланганди.

Матбуот анжумани вақтида шаҳар полиция бўлими бошлиғи Ойвинд Аас ҳозирча барча саволларга жавоб бера олмаслиги, чунки текширув энди бошлангани ва бу кенг кўламли текширув бўлишини маълум қилган.

У одамларга ўқ узган шахс қўлга олингани ва полиция маълумотига кўра жиноятчи ёлғиз ҳаракатланганини қўшимча қилган.

Маълум бўлишича, гумонланувчи Coop Extra супермаркетида одамларга ҳужум уюштирган. Кейинроқ у бошқа жойга кетган.

Ҳужум мотивлари ҳозирча маълум эмас. Полиция ҳозирча унинг ҳаракатларини теракт сифатида квалификациялашга иккиланмоқда, аммо бундай эҳтимол ҳам истисно этилмаяпти.

Аас Кунгсбергга Ослодан қўшимча кучлар, жумладан полиция бўлинмалари, портловчи қурилмалар бўйича мутахассислар ва тезкор ҳаракатланиш хизмати гуруҳи йўлланганини қўшимча қилган.

Кунгсберг мэри Анне Санд Норвегиядаги VG нашрига берган интервьюсида бу ҳодиса шаҳар учун ҳақиқий фожиа эканини айтиб ўтган: «Биз қўлимиздан келган барча ишни қиламиз», деган у ва шаҳардаги меҳмонхоналардан бири жабрланувчилар учун ёрдам кўрсатиш марказига айлантирилганини маълум қилган.

Ҳужумдан кейин Норвегия полиция бошқармаси мамлакатдаги барча ходимларга ўқотар қуролни ёнида олиб юриш бўйича кўрсатма берган. Қоидага кўра Норвегияда полициячилар алоҳида сабабсиз ўқотар қурол кўтариб юрмайди.

Кўпроқ янгиликлар