AQSh BMTning inson huquqlari bo‘yicha kengashi tarkibiga qaytdi

Jahon 22:58 / 14.10.2021 4202

BMT Bosh assambleyasi 14 oktyabrda 18 ta davlatni BMTning inson huquqlari bo‘yicha kengashiga a'zolikka 3 yillik muddatga sayladi. Ushbu davlatlar orasida AQSh ham bo‘lgan.

Kengashga nomzod barcha davlatlar: AQSh, Kamerun, Eritreya, Gambiya, Benin, Somali, Qatar, BAA, Qozog‘iston, Hindiston, Malayziya, Argentina, Paragvay, Gonduras, Lyuksemburg, Finlyandiya, Litva va Chernogoriya unga saylangan.

Hammasi bo‘lib kengashga 47 ta davlat kirib, ulardan uchdan bir qismi har yil qayta saylanadi.

AQShga 168 ta davlat ovoz bergan. “Biz kengashning inson huquqlarini himoya qilish va ilgari surish ishida to‘liq hajmda ishtirok etamiz. Bizning maqsadlar aniq – inson huquqlari himoyachilarini qo‘llab-quvvatlash va bu huquqlarni buzuvchilar hamda ularni suiiste'mol qiluvchilarga qarshi kurashishdir”, deb ta'kidlab o‘tgan AQShning BMTdagi doimiy vakili Linda Tomas-Grinfild.

AQSh inson huquqlari bo‘yicha kengashga to‘laqonli a'zo sifatida 2009 yilda qo‘shilgan. 2018 yil iyunda AQShning o‘shandagi prezidenti Donald Tramp mamlakatning kengash tarkibidan chiqqanini ma'lum qilgan. Biroq amaldagi prezident Jo Bayden 2021 yil yanvarda o‘z lavozimini bajarishga kirishgach, AQSh kengashga qaytishini e'lon qilgan. Tashkilot qoidalariga ko‘ra, kengashga saylovlar va uning tarkibining yangilanishi an'anaga ko‘ra faqat oktyabrda bo‘lib o‘tadi.  

 

Ko‘proq yangiliklar: