Британияда супермаркетлар пештахталари бўшаб қолди

Жаҳон 22:29 / 11.10.2021 15196

Британия супермаркетларида озиқ-овқат маҳсулотлари тугаб бормоқда. Бунинг сабаби - британияликлар тақчиллик туфайли маҳсулотларни захиралаб қўймоқдалар, деб хабар берди Daily Mail нашри.

Миллий статистика бошқармасининг хабар беришича, маҳсулотларнинг саросимада сотиб олиниши мамлакатнинг ҳар олтинчи фуқароси 25 сентябрдан 9 октябргача асосий озиқ-овқат маҳсулотларини харид қила олмаганига олиб келди.

9 октябрда интернетда мамлакатдаги дўконларнинг бўшаб қолган пештахталари суратлари тарқалди. Суратларда, шунингдек, харидорлар аравачалари ҳожатхона қоғози ва сув билан уюб ташланганини кўриш мумкин. Минглаб харидорлар Рождество байрамини тўкин дастурхон атрофида кутиб олиш учун 25 декабрга таомлар етказилишини олдиндан бронлаб қўйишган, ҳар учинчи британиялик эса ушбу кунга маҳсулотларни захиралашни бошлаган. The Grocer нашри ўтказган сўровномага кўра, истеъмолчиларнинг учдан икки қисми Рождество байрамига егуликлар ва ичимликлар тугашидан хавотир билдирмоқда.

Британияда бундай вазият ҳайдовчилар етишмаётгани билан боғланган. Маҳсулотларни етказиш тармоғи қўшимча 100 минг ходимга эҳтиёж сезмоқда, чунки Brexit ва пандемия сабабли мамлакатдан кўплаб хорижий ишчилар кетиб қолган. Бундан ташқари, ишчи кучи етишмаслигидан меҳмонхона бизнеси, қишлоқ хўжалиги ва озиқ-овқат саноати ҳам азият чекмоқда. Мамлакатда электр энергия нархи кескин кўтарилгани сабабли ўғит ишлаб чиқарувчи корхоналар ишлаб чиқаришни тўхтатишга мажбур бўлмоқда. Бу эса мамлакатга парранда, чорва гўшти ва қадоқланган озиқ-овқат маҳсулотлари тақчиллиги билан таҳдид солмоқда.

Британия ҳукумати муаммони ҳал қилиш учун қатъий чораларга бормоқда. Жумладан, яқинда маҳсулотлар етказилишига ҳарбий ҳайдовчилар жалб қилина бошланди. Расмий шахсларнинг таъкидлашича, ҳукумат тақчилликнинг олдини олиш учун ҳарбийларга байрам кунлари ҳам маҳсулотлар етказишни буюриши мумкин.

Кўпроқ янгиликлар