Ижтимоий тармоқларда Қашқадарё вилояти Шаҳрисабз шаҳрида жойлашган мактаблардан бирида ўқитувчилар мажбурий меҳнатга жалб қилингани айтилган хабарлар тарқалди. Хабарлар бўйича вилоят Халқ таълими бошқармаси ҳамда Шаҳрисабз шаҳар ҳокимлиги муносабат билдирди.

Вилоят ХТБнинг муносабатида ёзилишича, ҳолат юзасидан вилоят Халқ таълими бошқармаси ва тегишли соҳа масъуллари томонидан ишчи гуруҳ тузилиб, жараёнга қонуний ва ҳуқуқий баҳо берилиши юзасидан ўрганиш ишлари амалга оширилмоқда. Ўрганиш давомида тўпланган маълумотларга асосан тегишли тартибда қўшимча муносабат берилади.

«Қайд этиш жоизки, Қашқадарё вилояти Халқ таълими бошқармаси томонидан туман (шаҳар) халқ таълими бўлими мудирларига ва мактаб директорларига ўқитувчиларни мактаб ободончилиги (мажбурий меҳнат) ишларига жалб қилиш юзасидан бирор-бир топшириқ берилмаганини маълум қиламиз», дейилади муносабатда.

Шаҳрисабз шаҳар ҳокимлигининг муносабатида 7-мактабда ўқитувчилар мажбурий ишлатилгани юзасидан ўрганиш олиб борилгани маълум қилинган. Унга кўра, 2021 йилнинг 17 май куни 7-мактабда қурилиш-таъмирлаш ишлари бошланган. Шу куни қурувчилар томонидан синфхоналардаги муддати ўтган реклама баннерлари ўтиш йўлига қўйилган. Ўқитувчилар ва техник ходимлар йўлни тўсиб қўйган енгил тахталарни четга олиб қўйишган.

Таъкидланишича, 7-мактаб мактаб директори Ф.Исматова ва «Кеш гранд строй» МЧЖ раҳбари Ж.Зувириддинов, иш юритувчи Собир Ҳайдарқуловларнинг берган маълумотномасида ҳам худди шу ҳолат билдирилган.

«Ҳозирги кунда мутахассислар томонидан ушбу ҳолатни тўлиқ ўрганиш давом этмоқда. Натижаси ҳақида сизларни хабардор қиламиз», дейилади Шаҳрисабз шаҳар ҳокимлиги билдирган муносабатда.