Каттақўрғонда юз берган газ портлаши ҳақида қўшимча маълумот берилди. Қозоғистонлик меҳмон 50 фоизга куйган

Жамият 19:14 / 08.10.2021 1973

Каттақўрғон шаҳрида юз берган газ портлаши ҳақида қўшимча маълумот берилди. Қозоғистонлик меҳмон 50 фоизга куйган. Бу ҳақда Самарқанд вилояти Фавқулодда вазиятлар бошқармаси ахборот хизмати хабар бермоқда.

Маълум қилинишича, бугун, 8 октябр куни соат 4:50 ларда Каттақўрғон шаҳар Фавқулодда визиятлар бўлимига шаҳарнинг Кўхнадам маҳалласи, Тошкент кўчасида жойлашган уйларнинг бирида газ портлагани ҳақида хабар келиб тушган.

Хабарга асосланиб 4:45 да 2 та ёнғин-қутқарув гуруҳи ҳодиса жойига етиб борган. Газ портлаши оқибатида ушбу хонадонга Қозоғистондан меҳмон бўлиб келган 1982 йилда туғилган А.А (эркак киши) куйиш тан жароҳати олиб, Каттақўрғон шаҳар тиббиёт бирлашмасига юборилган.

Шифокорлар томонидан А.А.га юз, бўйин, кўкрак олди, иккала қўл соҳаси термик куйиш ташхиси қўйилган. Унинг танаси 50 фоизга куйиб кетгани маълум қилинган.

Дастлабки суриштирувда аниқланишича, мазкур хонадонда газ бўлмаган. Хонадонга яқин жойда ер остидан автомобилларга сиқилган газ қуйиш шохобчаларига ўтган табиий газ қувуридан сизиб чиққан газ уйга тўпланган ва портлаган.

Қайд этилишича, ҳодиса жойига ФВБ, ИИБ, ССБ ва бошқа тегишли идораларнинг куч ҳамда воситалари жалб қилиниб, вазият оқибатларини бартараф этиш бўйича ишлар олиб борилган. Ҳозирда ҳолат юзасидан суриштирув ишлари олиб борилмоқда.

Кўпроқ янгиликлар