Shavkat Mirziyoyev Farg‘ona viloyatiga tashrifi davomida qo‘shtepalik Jumaboy Ismoilov xonadonida mehmon bo‘ldi. Shu yerda Kun.uz muxbiri bosh vazir o‘rinbosari, Farg‘ona viloyatining sobiq hokimi Shuhrat G‘aniyevga bir savol bilan murojaat qildi. 

– Shuhrat Madaminovich, siz uzoq yillar viloyatga rahbarlik qilgansiz. Ayni paytda bosh vazir o‘rinbosarisiz. Aytingchi, bu ikki lavozimdan qaysi biri murakkabroq?

– Hozirgi ishim oldingisidan 100 karra qiyinroq, – qisqa javob berdi Shuhrat G‘aniyev.

Ma'lumki, Shuhrat G‘aniyev O‘zbekiston tarixida viloyatga eng uzoq rahbarlik qilgan hokimlardan biri. U 2011 yildan Farg‘ona viloyatiga hokimlik qilgan. U 2020 yilning 25 sentyabrida koronavirusdan vafot etgan O‘ktam Barnoyev o‘rniga bosh vazirning agrar va oziq-ovqat sohalarini rivojlantirish masalalari bo‘yicha bosh vazir o‘rinbosari lavozimiga o‘tkazilgandi.