«Ayrim saylov uchastkalarida saylovchilarning elektron hisobini yurituvchi texnologiyalar sinovdan o‘tkaziladi» - MSK

Kun.uz muxbiriga ko‘ra, unda Markaziy saylov komissiyasi a'zolari majlisi qarori bilan prezidentlikka nomzodlarning saylovoldi tashviqoti 2021 yil 20 sentyabrdan boshlanishi ma'lum qilingan. 

Tadbirda jurnalist Gruziya Respublikasida o‘tadigan saylovlarda har bir okrug bo‘yicha natijalar elektron tarzda saylov komissiyasi saytida joylashtirilishi va shu tartibni O‘zbekistonda ham joriy qilish borasida savol berdi.

«Gruziyadagi saylovlar vaqtida nomzodning har bir hudud bo‘yicha qancha ovoz olgani hamda saylovda qancha saylovchi ishtirok etganini elektron tabloda ko‘rish mumkin.

O‘zbekistonda 10 ming 760 ta uchastka saylov komissiyasi tashkil etilgan. Agar bizda ham har bir saylovchining elektron hisobini yuritadigan qurilmalar o‘rnatilsa, natijalarni yagona tabloda chiqarib qo‘yishimiz mumkin.

Biz 2009 yilda sinov tarzida 60 ta saylov uchastkasida shu kabi qurilmalarni o‘rnatdik. Joriy yilda ham shu kabi qurilmalarni o‘rnatish masalasi turibdi. Bunda har bir tumandagi bittadan saylov uchastkasida 2 tadan kuzatuv kamerasi o‘rnatiladi.

Bu amaliyot o‘zini oqlasa va mamlakat iqtisodi ko‘tarsa, saylovchilarning elektron hisobi yuritiladi. Markaziy saylov komissiyasi bu amaliyotning ijobiy va salbiy jihatlarni o‘rganib chiqamiz», – dedi MSK kotibi Xudoyor Mamatov.