APL. Ronaldu debyut o‘yinida dubl qildi, «MYu» yetakchiga aylandi

Angliya Premer-ligasi 4-turi doirasida «Manchester Yunayted» o‘z maydonida «Nyukasl»ni qabul qildi.

«Old Trafford»dagi o‘yinda Krishtianu Ronaldu «qizil iblislar» safidagi ikkinchi debyutini o‘tkazdi va 12 yildan keyingi qaytishni o‘ziga xos bayramga aylantirdi.

Uchrashuvni asosiy tarkibda boshlagan portugaliyalik 36 yoshli hujumchi 45+1-daqiqada hisobni ochib, jamoasini tanaffusga g‘olib sifatida olib chiqdi – 1:0.

Ikkinchi bo‘lim boshida Mankilo hisobni tenglashtirgan bo‘lsa-da, 62-daqiqada Ronaldu yana katta sahnaga chiqdi. Shouning uzatmasidan keyin himoyachilarni ortda qoldirgan Krishtianu qaytishini dubl bilan nishonladi – 2:1.

80-daqiqada Brunu Fernandesh uzoq masofadan ajoyib golga mualliflik qilgan bo‘lsa, 90+2-daqiqada Pogba – Marsiyal – Lingard kombinatsiyasini Jyessi ajoyib zarba bilan yakunlab qo‘ydi – 4:1.

Natijada, «MYu» 10 ochko bilan turnir jadvalida 1-o‘ringa chiqib oldi, «Nyukasl» 1 ochko bilan 19-o‘rinda qoldi.

APL. 4-tur.
Manchester Yunayted – Nyukasl 4:1
Gollar: 1:0 – 45 Ronaldu, 1:1 – 56 Mankilo, 2:1 – 62 Ronaldu, 3:1 – 80 Brunu Fernandesh, 4:1 – 90+2 Lingard.
Manchester Yunayted – De Xea, Uan-Bissaka, Varan, Maguayr, Shou, Matich, Pogba, Brunu Fernandesh (Marsyal, 85), Sancho (Lingard, 66), Ronaldu, Grinvud (van de Bek, 85).
Nyukasl – Vudmen, Mankilo (Merfi, 77), Klark (Lyuis, 84), Lassels, Xeyden, Ritchi, Almiron, Longstaff, Uillok (Xendrik, 86), Sen-Maksimen, Joelinton.
Ogohlantirish: Pogba (60).

#Krishtianu Ronaldu #Manchester Yunayted #Nyukasl