Қишлоқ хўжалиги вазири Жамшид Хўжаев АҚШ элчихонасининг муваққат ишлари вакили Пол Политис ва АҚШ Халқаро тараққиёт агентлиги (USAID)нинг Ўзбекистондаги миссияси директори Микаэла Мередит билан учрашув ўтказди, деб хабар бермоқда «Дунё».

2020 йилнинг июль ойида ўз фаолиятини бошлаган USAID’нинг Агробизнесни ривожлантириш дастури — мақсадли қишлоқ хўжалиги маҳсулотларига қўшимча қиймат қўшишнинг янги технологиялари ва бошқарув амалиётини жорий этиш орқали Ўзбекистон қишлоқ хўжалиги соҳасида хусусий сектор улушининг ўсишини қўллаб-қувватлашга қаратилган беш йиллик лойиҳадир.

«АҚШ ҳукуматининг қишлоқ хўжалигига техник ёрдам кўрсатиш, агроозиқ-овқат тизимларининг ишлаб чиқариш ва сотиш занжирлари салоҳиятини ривожлантириш борасидаги кўмагини жуда қадрлаймиз. Биз қишлоқ хўжалигида давлат бошқарувининг замонавий тизимини ва қулай агробизнес муҳитини яратишга ҳаракат қиляпмиз. Шу нуқтайи назардан, USAID’нинг агробизнесни ривожлантириш бўйича 18,9 миллион долларга баҳоланган янги лойиҳаси биргаликдаги ташаббусларимизни кучайтириш ҳамда аввалги «Қишлоқ хўжалигидаги қўшилган қиймат занжири» лойиҳаси ютуқларини кенгайтириш учун қулай имкониятга айланади», — дея таъкидлади Жамшид Хўжаев.

Тадбир давомида USAID Ўзбекистонда қишлоқ хўжалигида банд бўлган аёлларни қўллаб-қувватлаш учун қўшимча 1 миллион АҚШ доллари ажратишини маълум қилди.

Учрашувда, шунингдек, томонлар ўртасида қишлоқ хўжалигини ривожлантиришга кўмаклашиш учун ўзаро ҳамкорликни кучайтиришга қаратилган ўзаро Англашув меморандуми имзоланди.