Iqtisodchi Otabek Bakirov «E-auksion» elektron savdo platformasida sotilgan davlat obektlari bo‘yicha o‘z Telegram-kanalida fikr bildirdi.
«Ikki kun avval 2ta metan zapravka qariyb ikki barobar qimmatroqqa sotilganida e'tibordan chetda qolgan edi (1-mulk, 2-mulk).
Bugun esa Surxondaryo viloyati, Termiz shahrida joylashgan boshlang‘ich narxi 9,6 mlrd so‘mlik metan zapravka va servis markazi 23,2 mlrd so‘mga yoki 2,4 baravar qimmatroqqa sotilgan. 6 nafar ishtirokchi qariyb bir soat sotib olish uchun harakat qilgan.
Boysun tumanidagi boshlang‘ich narxi 6,4 mlrd so‘mlik metan zapravka uchun savdoda uch nafar ishtirokchi qatnashib, murosasiz o‘tgan auksion «XOJI-BARAKA» MChJning 14,5 mlrd so‘mlik narx taklifi bilan yakunlandi.
Radar o‘rnatish joyi savdosi to‘g‘risida yozganimdan keyin, ko‘pchilik «qimmat sotildi» degan fikrni aytishdi. Lekin oshkora o‘tkaziladigan savdolarda shunday bo‘ladi. Mulk 10 mlrd.ga arziydimi, 10 mlrd so‘mga ketadi. 30 mlrd so‘mlikmi 30 mlrd so‘mga sotiladi. Tadbirkor hisob-kitobini olib auksionda narx ko‘taradi. Ochiq auksionda qimmat yoki arzon narx degan narsa yo‘q, faqat bozor narxi bor — bu baraka narxi.
Shuning uchun biz doim ochiq auksionni qo‘llab-quvvatlaymiz. Auksionsiz sotilgan yuzlab yer uchastkalari va boshqa huquqlar sabab davlat budjeti trillionlarsiz qolmoqda. O‘rni kelganda har safar buni eslatishda davom etamiz», deya ta'kidlagan iqtisodchi.
