“Iqlimi issiq davlatlarda ommaviy ogohlantirish berilganda qo‘llanadigan huquqiy hujjatlar mavjud. Bunday hujjat bizdayam shakllantirilyapti. Hozirda yangilanish va to‘ldirish ishlari olib borilyapti. Tegishli tartibda shakllantirilib, Adliya vazirligidan huquqiy xulosa olingan holda, Vazirlar Mahkamasiga taqdim etildi”, – dedi “O‘zgidromet” rahbari o‘rinbosari Feruz Safarov 8 iyul kungi matbuot anjumanida.

O‘zbekiston Ekologik partiyasi fraksiyasi rahbari Xayrulla G‘afforov Mehnat kodeksining yangi tahririda noqulay ob-havo sharoiti yuzasidan yangi tartib-qoidalar kiritilayotganini aytdi.

“Oliy Majlis Qonunchilik palatasida hozirda 2-o‘qishda tayyorlanayotgan Mehnat kodeksi bor. Bu kodeksda bevosita noqulay ob-havo sharoitida ishlash bilan bog‘liq normalar kiritilyapti. Anomal issiqlik holatlarida yengilliklar berilishi shu qonun bilan qamrab olinadi”, – deya deputatning so‘zlarini keltirmoqda Kun.uz muxbiri.

Avvalroq, Kun.uz ayrim soha xodimlarining anomal issiqda mehnat qilayotganliklari, bunday noqulay sharoitda ishlash tartibiga qonunchilikda uzil-kesil oydinlik kiritilmagani haqida maqolalar e'lon qilgan edi.