Европарламент Ryanair самолётининг Минскда мажбуран қўндирилиши билан боғлиқ ҳолда Беларусга молиявий кўмакни рад этиш ва уни ҳар қандай халқаро тадбирлар, жумладан, Токио Олимпиадасида қатнашишдан четлатишга чақирувчи резолюцияни қабул қилди.

Тавсиявий характерга эга резолюцияни 626 депутат қўллаб-қувватлаган, 16 депутат унга қарши чиққан, 36 депутат бетараф бўлган. 

Резолюция Минскда Ryanair авиакомпанияси самолётининг мажбуран қўндирилиши ва унинг бортида бўлган беларуслик мухолифатчи Роман Протасевич ва унга ҳамроҳлик қилган россиялик София Сапеганинг ҳибсга олинишини кескин қоралайди. Европарламент депутатлари самолёт қўндирилишини «давлат террорчилиги акти» деб аташган.

Ҳужжатда Беларусга молиявий кўмакни, мамлакат банклари учун янги кредитлар беришни рад этиш ва Беларусь инфратузилмаси ҳамда иқтисодиётига сармоялар киритишни тўхтатиш зарурлиги айтилган.

Шунингдек, Европа молиявий институтлари Беларусь ҳукумати чиқарган қимматбаҳо қоғозлар ва бошқа молиявий активларни сотиб олишни тақиқлаши лозим.

Резолюцияда Беларусни халқаро тадбирлар, жумладан, спорт ўйинларидан четлатиш талаб этилади. Европарламент депутатлари, шунингдек, УЕФАни Беларусь давлат телевидениесини футбол бўйича бошланадиган Европа чемпионатини намойиш қилиш ҳуқуқидан маҳрум этишга ва ушбу ҳуқуқни «Белсат» мустақил телеканалига бепул беришга чақиришган.  

Бундан ташқари, Европарламент Беларуснинг нефт ва нефт маҳсулотлари, пўлат ишлаб чиқариш ва ёғочни қайта ишлаш каби муҳим тармоқларига нисбатан иқтисодий чоралар кўришни талаб қилмоқда. Резолюцияда Минск Протасевич, Сапега ва бошқа беларуслик сиёсий маҳкумларни дарҳол ва ҳеч қандай шартсиз озод қилишга чақирилган.

Ҳужжатда, шунингдек, Ryanair самолётининг Минскда қўндирилишига алоқадор барча беларуслик жисмоний ва юридик шахсларга нисбатан зудлик билан санкциялар киритиш таклиф қилинган.