Россиянинг Шимолий Кавказ федерал университети Самарқанд давлат университети негизида хорижий ваколатхонасини очади. Университет матбуот хизматида хабар қилинишича, бу Россия университетининг илк хорижий ваколатхонаси бўлади.    

«Олий таълим муассасалари ўртасида ҳамкорликни мустаҳкамлашдаги муҳим қадам Самарқанд давлат университетида Шимолий Кавказ федерал университети ваколатхонасини ташкил этиш бўлади. Ваколатхона фаолиятининг асосий йўналишлари абитуриентлар билан ишлаш, қўшма таълимий, илмий ва гуманитар лойиҳаларни амалга оширишдан иборат», деб маълум қилинган хабарда. 

Университетлар ҳозирда икки томонлама диплом олиш имконини берувчи 6та магистратура дастурини йўлга қўйган. 2021 йилдан магистратура йўналиши бўйича янги ва бакалавриат бўйича иккита дастурга талабаларни қабул қилиш бошланади. Олий таълим муассасалари, шунингдек, қўшма илмий тадқиқотларни ўтказишни режалаштирмоқда.  

«Ўзбекистон илмий-таълимий ҳамкорликни ривожлантириш учун истиқболли давлатлардан бири ҳисобланади, Самарқанд давлат университети эса бизнинг стратегик ҳамкоримиз. Биз илк хорижий ваколатхонамизни айнан шу таълим даргоҳида бежизга очмаяпмиз», деб айтган Шимолий Кавказ федерал университети ректори Дмитрий Беспалов. 

Шунингдек, университетлар минтақавий ривожланишнинг табиий ва ижтимоий-иқтисодий хусусиятларини ўрганиш учун халқаро лаборатория очишни режалаштирмоқда. Яқин келажакдаги режалар орасида икки давлатдаги табиий жараёнларни мониторинг қилиш, атроф-муҳитни муҳофаза қилиш, этнодемографик ва миграция жараёнлари, урбанизацияни тадқиқ қилиш ва туризмни ривожлантириш кабилар бор.