Жанубий Африка Республикасида бирданига 10 фарзандни дунёга келтирган аёл ҳақидаги хабар бутун дунёга тарқалгандан кейин ҳукумат аёлни қидиришга тушиб кетди ва ҳозирча бунинг уддасидан чиқа олмаяпти.

Аввалроқ рекорд сонда эгиз фарзанд туғган аёл ҳақидаги хабар ОАВда ва ижтимоий тармоқларда тарқалди. Аёл бирданига 7 ўғил ва 3 қизни дунёга келтириб, рекорд ўрнатгани маълум қилинганди. Бироқ ҳукумат ҳозирча аёлни ҳам, чақалоқларни ҳам топа олмаяпти.

“Ҳукумат ОАВ ва ижтимоий тармоқларда жанубий африкалик аёл 10 фарзанд дунёга келтиргани ва жаҳон рекордини ўрнатгани ҳақидаги хабарга эътибор қаратди. Чақалоқларни Гаутенг провинциясида яшовчи Гозиам Тамара Ситхол дунёга келтиргани айтилмоқда. Бироқ ҳукумат мамлакат тиббий муассасаларида бундай туғуруқ ҳолати қайд қилинганини тасдиқлай олмайди”, деб айтган ҳукуматнинг жамоатчилик билан алоқалар бўйича вакили Фумла Уильямс.

Таъкидланишича, аёл ва унинг турмуш ўртоғи турли урф-одатлар сабабли панада қолаётган бўлиши мумкин.

Ҳозирда жуфтликни қидириш ишлари давом этмоқда.

Маҳаллий шифокорлар ҳам ҳозирча бу хабар бўйича баёнот беришмаган. “Агар ушбу туғуруқ ўтган шифохона ходимлари уни тасдиқлашса, бу жаҳон рекорди бўлади ва Гиннесс рекордлар китобида қайд қилинади”, деб таъкидлаб ўтган маҳаллий радиостанция SABC.

Ҳозирда бу борада Гиннесс рекорди жорий май ойида бирданига 9 фарзандни дунёга келтирган малилик Ҳалима Сиссега тегишли.