“Marg‘ilon” TIF bojxona postida eksport qilish taqiqlangan 2 milliard 348,9 million so‘mlik 1014 tonna mineral o‘g‘it tovarlari to‘xtatib qolindi.  Bu haqda viloyat bojxona boshqarmasi axborot xizmati Kun.uz'ga ma'lum qildi.

Qayd etilishicha, Farg‘ona viloyati bojxona boshqarmasi Kontrabandaga qarshi kurashish va bojxona auditi bo‘limi xodimlari tomonidan tezkor tadbir o‘tkazilgan. Tadbir davomida “Marg‘ilon” TIF bojxona postida Farg‘ona viloyatida ro‘yxatdan o‘tgan korxona nomidan xorijga “eksport” bojxona rejimida rasmiylashtirilgan jami 1 014 tonna mineral o‘g‘itlar tovarlari korxona ishonchli vakili ishtirokida tegishli tartibda ko‘zdan kechirilgan.

Tekshiruvda namunalar belgilangan tartibda ekspertizadan o‘tkazilganida, azot va kaliy aralashmali mineral o‘g‘itlar emasligi, balki boshqa korxonalar tomonidan ishlab chiqarilgan “karbamid” mineral o‘g‘it tovari ekanligi ma'lum bo‘ldi.

“Karbamid” mineral o‘g‘itini eksport qilish taqiqlangani sababli, qiymati 2 milliard 348,9 million so‘mlik 1 014 tonna mineral o‘g‘it tovarlari to‘xtatib qolindi. Hozirda holat yuzasidan tergovga qadar tekshiruv harakatlari olib borilmoqda.

Avvalroq, Quvasoy shahrida 80 million so‘mlik konditsioner va changyutkichlarning noqonuniy aylanmasiga chek qo‘yilganligi haqida  xabar berilgan edi.