Kun.uz manbasi ma'lumotiga ko‘ra, marhum aprel-may oylarida koronavirusga chalinib shifoxonada davolanib chiqqandi. Uning o‘limiga ushbu kasallik asoratlari sabab bo‘lgani taxmin qilinmoqda.

Safar Ostonov 1948 yilda Samarqand viloyati Kattaqo‘rg‘on tumanida tug‘ilgan, 1972 yilda Toshkent davlat universitetini jurnalistika yo‘nalishida tamomlagan.

1990-yillarda «Sport» va «O‘zbekiston futboli» gazetalarida bosh muharrir bo‘lgan, keyinroq O‘zbekiston prezidenti apparatida maslahatchi sifatida ishlagan.

1999 yilda O‘zbekiston Respublikasida xizmat ko‘rsatgan jurnalist davlat mukofoti bilan taqdirlangan.

U 2000-yillar boshlaridan beri «O‘zbekiston ovozi» va «Golos Uzbekistana» gazetalari bosh muharriri sifatida ishlab kelayotgan edi.

Safar Ostonov 2019 yil dekabrida bo‘lib o‘tgan parlament saylovlarida 63-Kattaqo‘rg‘on saylov okrugidan Xalq demokratik partiyasi nomidan Qonunchilik palatasi deputati etib saylangan, Ekologiya va atrof-muhitni muhofaza qilish masalalari qo‘mitasi a'zosi edi.