Toshkent viloyatida “Ramazon tuhfasi” aksiyasi doirasida tadbirkorlar, ishbilarmonlar, saxovatpesha insonlar tomonidan muhtoj oilalarga yordam berildi. Bu haqda Toshkent viloyati hokimligi axborot xizmati ma'lum qildi. 

Mazkur aksiya boshlanganidan to hozirga qadar 1 ming 500 dan ortiq oilalarga 1 mlrd 437 mln 247 ming so‘mlik moddiy mehr-muruvvat yordami ko‘rsatilib, oziq-ovqat mahsulotlari, uy-ro‘zg‘or buyumlari va pul mablag‘i ajratilgan.

Xususan, 8 may holatiga 300 dan ziyod ijtimoiy himoyaga muhtoj oilalarga yordam ko‘rsatilgan. Angren shahar bosh imom-xatibi Yahyoxon domla Baboxonov tashabbusi bilan homiylarni jalb qilgan holda kam ta'minlangan, nogironligi bor, yakka-yolg‘iz ayol va boquvchisini yo‘qotgan 145 ta oilaning har biriga 1 mln so‘mlik oziq-ovqat mahsulotlari ham ehson qilingan. 

«Bo‘ka tumani “Moy-tepa” jome masjidi imom xatibi tashabbusi bilan ehtiyojmand 15 nafar oilaga 3 mln so‘mlik oziq-ovqat mahsulotlari, “Mulla Abduroziq” jome masjidi imom xatibi Abduzoxir Abloqulov tashabbusi bilan ehtiyojmand 10 nafar oilaga jami 10 mln so‘mlik moddiy yordam berildi. Zangiota tumani “Umir” jome' masjidi imom-xatibi Fayzullajon domla Abdulhamidov boshchiligida 30 nafar kam ta'minlangan, nogironligi bor, yakka-yolg‘iz keksalar, boquvchisini yo‘qotgan oilalarga 15 million so‘mlik oziq-ovqat mahsulotlari tarqatildi» – deyiladi xabarda.