Prezident: «Aholini oziq-ovqat bilan ta'minlash dolzarb masalaga aylanib bormoqda»

O‘zbekiston 11:21 / 12.05.2021 6421

Shavkat Mirziyoyev makroiqtisodiy vaziyat, hududlar va tarmoqlarda iqtisodiy o‘sishni ta'minlash bo‘yicha birinchi yarim yillikdagi vazifalar muhokamasiga bag‘ishlangan videoselektor yig‘ilishi o‘tkazmoqda.

“Aholini oziq-ovqat bilan ta'minlash kun sayin dolzarb masalaga aylanib bormoqda. Lekin, ayrim hududlarda ba'zi turdagi oziq-ovqat mahsulotlari ishlab chiqarish hajmlari kamayishiga yo‘l qo‘yilmoqda.

Misol uchun, tuxum ishlab chiqarish hajmi Toshkent viloyatida – 5 foizga, Sirdaryoda – 4 foizga kamayishi hisobiga ushbu viloyatlarda tuxumning narxi 7 foizga, respublika bo‘yicha esa 3,6 foizga oshgan. Nahotki shuncha berilgan imkoniyatlarga qaramay, bitta tuxum ishlab chiqarishni yo‘lga qo‘ya olmayapsizlar?

Go‘sht va o‘simlik yog‘ining ham jahon bozoridagi narxlari 1 yildan buyon to‘xtovsiz o‘sayotgani barcha rahbarlarni zarur chora-tadbirlarni ko‘rishga undashi kerak. Umuman, har bir hokim 3 oylik zaxira yaratilishi bo‘yicha alohida hisobot beradi. Bu masalaga sust qaralsa, odamlar norozi bo‘ladi.

Joriy yilda chorvachilik yo‘nalishida 1 mingta, parrandachilikdagi 277 ta loyihani ishga tushirish hisobiga 13 ming tonna go‘sht, 608 ming tonna sut, 3 milliard dona tuxum va 14 ming tonna parranda go‘shti yetishtirilishi ta'minlanishi lozim.

1,1 million gektar asosiy maydonlarda 224 ming gektar bog‘-tok oralariga hamda g‘alla va ertangi ekinlardan bo‘shaydigan 873 ming gektarga sabzavot, kartoshka, poliz, sholi, moyli va ozuqa ekinlarini yetishtirishni tashkil etish zarur.

Yog‘-moy mahsulotlariga ichki bozorda aholi talabini qondirish maqsadida, joriy yilda 246 ming tonna moyli ekinlarni yetishtirish va buning hisobiga 86 ming tonna moy ishlab chiqarilishini ta'minlash kerak”, dedi davlat rahbari.

Ko‘proq yangiliklar: