Samsung Galaxy S20 smartfoni kamerasi oynasidagi  kichik nuqson yirik sud tortishuviga sabab bo‘ldi. AQShning Hagens Berman yuridik firmasi jabrlanuvchi foydalanuvchilar nomidan koreys kompaniyasiga qarshi sudga jamoaviy da'vo arizasi topshirdi. 

 Ma'lum bo‘lishicha, Samsung’ning 2020 yilda chiqqan flagman smartfoni foydalanuvchilari uning kamera bloki ustini qoplab turuvchi oyna o‘z-o‘zidan darz ketishi muammosiga to‘qnash kelishdi. Hattoki ba'zi smartfonlarda ushbu oyna go‘yoki ataylab sindirilgandek ko‘rinishda bo‘lgan.

 Samsung ushbu muammoni istar-istamasdan tan olgan bo‘lsa-da, kafolat bo‘yicha ta'mirlashdan bosh tortgan. Kompaniya foydalanuvchilarga mittigina oynani ular hisobidan 400 dollarga almashtirib berishni taklif qilgan. Arzimas xizmat uchun bunday katta narx so‘ralishi smartfonni ta'mirlash uchun Janubiy Koreyaga jo‘natish kerakligi bilan tushuntirilgan.

 Da'vo arizasida koreys kompaniyasi xaridorlar huquqiga amal qilmaslikda va kamchilikni bartaraf etishni foydalanuvchilar zimmasiga yuklashda ayblanmoqda. Jamoaviy arznomaga sud ishi yutib chiqilsa, kompensatsiya va'da qilingan holda qolgan foydalanuvchilarning ham qo‘shilishi taklif qilingan.