Zangiotada haydovchidan olib qo‘yilgan otvyortka qaytarib berildi, IIB xodimi ogohlantirildi

Zangiota tumanida «Spark» avtomobili haydovchisidan sovuq qurol sifatida rasmiylashtirilib, olib qo‘yilgan otvyortka egasiga qaytarilgan. IIB xodimiga esa ogohlantirish berilgani ma'lum qilindi.

Foto: Ijtimoiy tarmoqlar

O‘tgan oyda Toshkent viloyati Zangiota tumanida «Spark» avtomobili to‘xtatilib, haydovchining yonidan chiqqan otvyortka sovuq qurol deb topilgan, YPX xodimi tomonidan dalolatnoma tuzilgandi. Bu holat ijtimoiy tarmoq foydalanuvchilari, ayniqsa haydovchilar o‘rtasida bahs-munozaralarga sabab bo‘lib, IIB xodimlarining bu harakatlari qoralangan edi.

Shundan so‘ng Toshkent viloyati IIBB holat yuzasidan surishtiruv boshlanganini ma'lum qilgandi.

Ichki ishlar vazirligi matbuot xizmati rahbari Shohrux G‘iyosov 23 aprel kuni Kun.uz'ga taqdim etgan ma'lumotga ko‘ra, haydovchidan olib qo‘yilgan otvyortka egasiga qaytarib berilgan.

Avtomobilda bo‘lishi lozim bo‘lgan muhim ish (texnik sozlash) qurollaridan biri bo‘lgan otvyortkani sovuq qurol deb baholab, dalolatnoma tuzgan va uni haydovchidan olib qo‘ygan profilaktika inspektori A.Almanov ichki ishlar organi xodimlari kasb etikasiga qat'iy rioya qilish lozimligi haqida ogohlantirilgan.

Eslatib o‘tamiz, Shohrux G‘iyosov 9 aprel kuni Kun.uz'ga bergan intervyusida «otvyortka» sovuq qurol deb baholanganini ma'qullamasligini bildirgan, ammo masalaga xizmat tekshiruvi natijasidagina baho berilishini aytgandi.

#IIB #Zangiota tumani