Жорий йилнинг 14 апрель куни Бухоро туманида мудҳиш қотиллик содир этилди. Бу ҳақда Бухоро вилояти ИИБ ахборот хизмати хабар берди.

Маълум қилинишича, 1970 йилда туғилган И.Ш. ўзаро келишмовчилик натижасида қўшниси, 1959 йилда туғилган Р.Н.нинг яшаш хонадонига бориб, жанжаллашган. Жанжал пайтида у ўзи билан олиб борган ошхона пичоғи билан Н.Р.нинг чап томон бўйин соҳасига бир маротаба ва ўнг томон қўлтиқ остига икки маротаба, шунингдек, унинг ўғли Ф.Р.нинг қорин қисмига бир маротаба урган.  

Бунинг оқибатида, ота ва бола олган тан жароҳати билан РШТЁИМ Бухоро филиалига ётқизилган. Кўрсатилган муолажаларга қарамасдан Н.Р. жонлантириш бўлимида вафот этган.

Ҳолат юзасидан туман прокуратураси томонидан И.Ш.га нисбатан Жиноят кодексининг 25-, 97-моддаси 2-қисми «а» банди билан жиноят иши қўзғатилган. 

Ушбу жиноят 16 апрель куни Бухоро вилояти прокурори Маҳмуд Истамов ва ИИБ бошлиғи Шуҳрат Алиев томонидан туман ҳокими ҳамда сектор раҳбарлари, тегишли масъуллар иштирокида жиноят содир қилган шахс ва жабрланувчилар истиқомат қилган маҳаллада муҳокама қилинган.