Туркиядаги вазият: ҳукумат янги тўлқинни жиловлашга уринмоқда ва янада қатъий чекловлардан огоҳлантирмоқда

Жаҳон 23:21 / 14.04.2021 13510

«Айниқса йирик шаҳарларда касалланиш ва ўлим кўрсаткичлари ошиши бизни яна вирусга қарши чораларни қатъийлаштиришга мажбур қилмоқда», деган Туркия президенти Ражаб Тоййиб Эрдўған ҳукумат йиғилишидан кейинги матбуот анжуманида.

Сўнгги бир ҳафтада мамлакатда кунлик касалланиш ҳолатлари 50 мингдан пастга тушгани йўқ.

«Бизнинг мақсадимиз - дастлабки икки ҳафтада [Рамазоннинг] янги касалланиш ҳолатлари ва ўлим ҳолатлари сонини жиддий қисқартиришга эришишдир. Агар биз бунга эриша олмасак, янада қатъий чоралар қўллашга тўғри келади», дея қўшимча қилган президент. У қатъий чоралар сифатида кўчага чиқиш тақиқланадиган тўлиқ локдаунни назарда тутган.

Чоршанба куни Туркия ички ишлар вазирлиги комендантлик соати ва шаҳарлараро ҳаракатланишга тақиқ муддати узайтирилганини маълум қилди, шунингдек, спорт заллари ва бассейнлар ёпиқлигича қолади, тўйларга тақиқ сақланиб қолинади, мактабларда онлайн таълим давом этади.

Жамоат транспортида ўринларнинг ярми бўш қолдирилади, 65 ёшдан катта кишилар уйдан чиқиши чекланади - фақат соат 10:00дан соат 14:00гача кўчага чиқиш мумкин.

Чеклов чоралари мамлакатнинг барча провинцияларида кучайтирилган, ҳатто коронавирусга чалиниш кўрсаткичлари паст даражада бўлган ҳудудларда ҳам.

Ҳаддан ташқари эрта очилиш

ЖССТ маълумотларига кўра, Туркияда касалланиш даражаси ўcиши март ойи ўрталарида бошланган. 31 март куни кунлик касалланиш кўрсаткичи декабрь ойидаги даражадан (33 минг) ошган ва 37 мингга етган.

Бир ҳафта олдин кунлик касалланиш кўрсаткичи 49 мингга чиқди, кейинги куни эса 54 минг кишида касаллик аниқланди ва шундан кейин кунлик кўрсаткич 50 мингдан пастга тушмади. Туркияда бугунги кунга келиб коронавирус туфайли қайд этилган ўлим ҳолатлари сони 34 мингдан ошган.

Шу билан бирга, мамлакатда аҳолини эмлаш жараёни кенг кўламда олиб борилмоқда. Ўтган якшанба куни Туркияда 18 миллиондан ортиқ фуқаро коронавирусга қарши эмланган, уларнинг катта қисми - Хитойнинг Sinovac фирмаси вакцинаси билан.

Касалланиш даражаси кескин ўсишини март ойи бошида кафелар ва ресторанлар очиб юборилиши билан изоҳлашмоқда, ўшанда ҳукумат иқтисодни тиклаш учун шундай йўл тутганди. Март ўрталарига келиб Эрдўған ҳукумат карантин чораларини қатъийлаштирмоқчи эмаслигини айтганди.

Мухолифат ва айрим шифокорлар ўтган ҳафтадаёқ қатъий локдаун жорий этишга чақира бошлаганди. Истанбул мэри Акром Имомўғли BBC билан суҳбатда шаҳарда бир кунда жамоат транспортидан фойдаланаётган инсонлар сони бир миллион атрофида эканини қайд этганди. У шаҳар бўйлаб ҳаракатланаётганлар сонини «ақл бовар қилмас» деб атаганди.

Шифохоналардаги вазият
Қоидага кўра, касалланиш даражаси тезлашганида асосий юклама шифохоналарга тушади. Аввалроқ айрим туркиялик экспертлар пандемия мамлакат соғлиқни сақлаш тизимида коллапс юзага келтириши мумкинлигини айтишганди.

«Ҳар куни янги ҳолатлар сони ўсмоқда. Ҳар куни - ўлимлар сони ўсмоқда. Жонлантириш бўлимларида - хавотирли вазият», - деганди ўтган ҳафтада Туркия интенсив терапия бўлимлари уюшмаси раҳбари Исмоил Синел.

«Афсуски, биз карантин чораларини юмшатдигу, вакцинацияни тезлаштира олмадик», - деди Hurriyet газетасига берган интервьюсида мамлакат соғлиқни сақлаш вазири Фахриддин Хўжа.

«Ҳозирда муаммолар йўқ. Аммо яна уч-тўрт ҳафта шу ҳолат давом этса, муаммолар туғилади», - дея шифохоналардаги вазиятга баҳо берган вазир. У айни вақтда мамлакатдаги шифохоналар 55 фоизга тўлгани, реанимация бўлимлари эса - 67,4 фоизга банд экани ҳақида маълумот берган.

«Британча» штамм ҳаммаёқда
Вазир Фахриддин Хўжанинг сўзларига кўра, Туркиядаги эпидемиянинг алоҳидалиги - янги касалланиш ҳолатларининг 85 фоизи ўтган йил кузида Британияда аниқланган янги штамм билан боғлиқлигидадир.

Осон ва тез юқувчанлиги билан ажралиб турган бу штамм Британия маълум вақт давомида Европанинг қолган қисмидан ажралиб қолишига сабаб бўлганди. Аввалроқ британиялик олимлар бу штамм бутун дунё бўйлаб устунлик қилиши мумкинлиги ҳақида прогноз беришганди.

Мамлакатда ЖАР ва Бразилияга мансуб штаммлар ҳам аниқланган, аммо кенг миқёсда эмас.

«Жанубий Африка варианти 11 провинцияда 285 кишида, бразилча штамм эса - 9 провинцияда 166 кишида аниқланган», - дея маълум қилди вазир душанба кунги матбуот анжуманида.

У Туркияда кузатилаётган ҳолатни эпидемиянинг янги чўққиси деб баҳолади ва агар кўрсаткичлар пасаймаса, Туркия ҳукумати «бемисл чекловлар» жорий этишидан огоҳлантирди.

Кўпроқ янгиликлар