Prezidentning “Iqtisodiyot tarmoqlarida kosmik texnologiyalardan foydalanishni takomillashtirish chora-tadbirlari to‘g‘risida”gi qarori loyihasi e'lon qilindi.
Masofaviy zondlash ma'lumotlarini iqtisodiyot tarmoqlariga faol joriy etish, davlat organlari faoliyatini optimallashtirish, aerokosmik tadqiqotlar va texnologiyalarni rivojlantirish uchun shart–sharoitlar yaratish maqsad qilingan.
Vazirlar Mahkamasi huzuridagi Kosmik tadqiqotlar va texnologiyalar agentligi («O‘zbekkosmos»), Davlat soliq qo‘mitasi huzuridagi Kadastr agentligi va Davlat aktivlarini boshqarish agentligining quyidagilarni beg‘araz topshirish to‘g‘risidagi taklifiga rozilik beriladi:
Kadastr agentligi tasarrufidagi «Geoinnovatsiya markazi» davlat unitar korxonasi, shu jumladan, moddiy-texnika bazasi, uchuvchisiz uchish apparatlari, shuningdek, uning balansidagi bino va inshootlarni «O‘zbekkosmos» agentligi tarkibiga;
«O‘zbekkosmos» agentligi tasarrufiga 50 dona miqdoridagi GNSS global sun'iy yo‘ldosh joylashishini aniqlaydigan doimiy ishlaydigan stansiya tarmoqlari, shu jumladan, ularni boshqarish uchun o‘rnatilgan dasturiy ta'minotni.
«O‘zbekkosmos» agentligi huzuridagi «Geoinnovatsiya markazi» DUK faoliyati asosiy yo‘nalishlari etib quyidagilar belgilanadi:
- iqtisodiyot tarmoqlari ehtiyojlari uchun yerni masofadan turib zondlash;
- sun'iy yo‘ldosh orqali olingan ma'lumotlar asosida geografik axborot tizimlari, geoservislar ishlab chiqish va joriy etish;
- davlat kadastr ma'lumotlarini shakllantirishda yordam berish;
- geodezik, topografik va kartografik ishlar olib borish;
- uchuvchisiz uchish apparatlarini boshqarish sohasida mutaxassislar tayyorlash;
- yuridik va jismoniy shaxslarga uchuvchisiz uchish apparatlaridan foydalangan holda xizmat ko‘rsatish;
- uchuvchisiz uchish apparatlarini ta'mirlash va texnik xizmat ko‘rsatish.
Shunday tartib o‘rnatiladiki, unga ko‘ra «Geoinnovatsiya markazi» DUKning uchuvchisiz uchish apparatlari va yerni masofadan turib zondlash ma'lumotlari yordamida aniqlangan, Ma'muriy javobgarlik to‘g‘risidagi kodeks VIII bobi moddalarida nazarda tutilgan ma'muriy qonunchilik buzilishlari, ma'muriy huquqbuzarliklar to‘g‘risidagi ishlarni ko‘rib chiqish va huquqbuzarlarga ma'muriy jazo qo‘llash bo‘yicha vakolati tegishli organlarga beriladi, bunda undirilgan jarimalar summasi 50 foizi miqdorida «Geoinnovatsiya markazi» DUK hisobraqamiga o‘tkaziladi.
