Chirchiq shahar IIB boshlig‘i prezidentdan dakki eshitdi. Keyin u ham mahallaga konteyner-uy o‘rnatdi

Natijada ushbu hududga mas'ul 3-sektor rahbari – shahar ichki ishlar bo‘limi boshlig‘i polkovnik Dilshod Muhammadjonov prezidentdan tanbeh eshitdi.

«Bir oyda menga rasmini berasan. O‘zing butun kuchingni tashlaysan. O‘zing qo‘lingga ‘lopatka’ olasan. O‘lasanmi shuni qildirib qo‘ysang? Uyalmaysanmi, sektor degani nima degani?» – dedi Shavkat Mirziyoyev sektor rahbariga qarata.

Toshkent viloyati IIBB matbuot xizmati 20 mart kuni bergan xabarga ko‘ra, prezident tashrifidan keyin «Iftixor» MFYda Chirchiq shahar IIB boshlig‘ining xizmat uyi tashkil etilgan.

Xizmat uyida shu yerlik aholi muammolari va murojaatlari bilan ishlovchi 3-sektor tezkor shtabi faoliyat boshlagan.

Prezident Shavkat Mirziyoyev yil boshidan buyon hududlarga an'anaviy tashriflari davomida rejadan tashqari mahallalarni aylanmoqda. «Mahallabay» ishlash siyosati doirasida rahbarlardan aholi muammolarini bevosita hududlarga borgan holda hal etish talab etilmoqda.

• Fevral oyi oxirida prezident Namangan shahridagi Bunyodkor mahallasiga borgach, viloyat hokimi Shavkatjon Abdurazzoqov u yerdagi muammolar hal etilishiga shaxsan o‘zi bosh bo‘lishini e'lon qildi va mahallaga o‘zi uchun konteyner-uy qurdirdi. Uning bu tashabbusini selektorlardan birida davlat rahbari namuna qilib ko‘rsatdi.
• Ko‘p o‘tmay Buxoro viloyati hokimi va viloyat soliq boshqarmasi boshlig‘i ham konteynerda ishlay boshladi.