«Elektrotexnika sanoatini yanada rivojlantirish va mahalliy mahsulotlarning raqobatbardoshligini oshirishga doir qo‘shimcha chora-tadbirlar to‘g‘risida» prezident qarori imzolandi.

Qarorga asosan, 2021–2022 yillarda elektroskuterlar, velosiped va elektromotoroller ishlab chiqarishga ixtisoslashgan 4ta zavod ishga tushirilishi rejalashtirilgan.

Barcha loyihalar xususiy tadbirkorlarning mablag‘lari hisobiga amalga oshirilib, ulardan uchtasi «Qo‘qon» erkin iqtisodiy zonasi hududida bo‘lishi ko‘zda tutilgan.

Xususan, Bicycle Tranding Invest korxonasi yiliga 4,5 ming elektroskuter ishlab chiqarishga 1,5 million dollar sarmoya kiritadi. Loyihaning ishga tushirilishi 2021 yilning noyabr oyiga mo‘ljallangan.

Stroy Plast firmasi yiliga 1,5 ming elektroskuter, 5 ming elektromotoroller va 500 ta velosiped ishlab chiqarishga 505 ming dollar sarmoya kiritishi belgilangan. Ishlab chiqarish jarayonining boshlanishi 2022 yilning mart oyiga rejalashtirilgan.

Shuningdek, Velomax korxonasi yiliga 20 ming elektroskuter ishlab chiqarishga 4 million dollar sarmoya kiritadi. Loyihani ishga tushirish 2022 yil dekabrga mo‘ljallangan.

Bundan tashqari, Technoworld korxonasi yiliga 2 ming elektromotor va skuter ishlab chiqarishga 2,2 million dollar sarmoya kiritadi. Bu loyiha Uchko‘prik tumanida amalga oshirilib, 2022 yil iyun oyida ishga tushirilishi ko‘zda tutilgan.

Umuman, qaror bilan, elektrotexnika sanoatida 136ta loyiha amalga oshirilishi ko‘zda tutilgan. Shu bilan birga, elektrotexnika mahsulotlari ishlab chiqaruvchilarga qator imtiyozlar berilib, Elektr elektrotexnika sanoatini rivojlantirish jamg‘armasiga 75 milliard so‘m ajratiladigan bo‘ldi.