Oliy va o‘rta maxsus ta'lim vaziri Abduqodir Toshqulov talabalarning yotoqxonalarga bo‘lgan ehtiyoji haqida ma'lumot berdi.

«Oliy ta'limda qabul kvotalari qariyb 3 baravarga oshdi, lekin talabalar yotoqxonalarida o‘rinlar soni atigi 25 foizga oshdi, xolos. Shuning uchun ko‘plab talabalar ijarada yashab, muammolarga duch kelmoqda. Hozirda respublikada 228ta talabalar turar joyida 58 ming talaba istiqomat qilyapti, 2017 yilda esa 194ta talabalar turar joyida 50,5 ming talaba yashagan.

Yotoqxonalarda yashashga ehtiyoji bo‘lgan talabalar soni 149,4 mingni tashkil etadi.

Ta'lim tizimiga sirtqi, kechki ta'lim shakllari kiritilishi talabalarning yotoqxonalarga bo‘lgan talabini yanada oshirdi. Sirtqi bo‘limga o‘qishga kirgan talabaning bir oy bo‘lsa ham talabalar turar joyida yashashga ehtiyoji bor. Chunki uning o‘sha joyda qarindoshi bo‘lmasligi yoki ijarada imkoni bo‘lmasligi mumkin. Buni amaliyotda o‘zimiz ko‘rdik», dedi vazir Abduqodir Toshqulov.