Amerika banki hisobotiga tayanib Reuters’ning xabar berishicha, Brent tipidagi neft narxlari koronavirus pandemiyasi, Texasda havo harorati keskin sovib ketishi, OPeK+ ishlab chiqarish cheklovlari va global valuta stimulining tengsizligi sabab o‘sib bormoqda.

So‘nggi o‘sish ko‘rsatkichlarida Brent nefti narxi 0,4 foizga oshib, bir barreli uchun 65,51 dollarni tashkil etdi. WTI nefti esa 0,5 foizga ko‘tarilib, bir barreli uchun 62 dollarga baholandi.

Bank prognozlarida Brent neftining 2021 yilda barreli uchun o‘rtacha 60 dollar bo‘lishi kutilmoqda. WTI neftining bu yil uchun o‘rtacha bir barreli 57 dollarni tashkil etishi taxmin qilinmoqda.

«2021 yilning ikkinchi choragida Brent narxlari vaqtincha barreliga 70 dollarga ko‘tarilishi mumkin», deyiladi bank tahlilchilari notasida.

Ma'lum qilinishicha, Saudiya Arabistoni fevral va mart oylarida neft qazib olishni qisqartiradi.

Yaqinda AQShda neft qazib olishning umumiy hajmi uchdan bir qismga – rekord darajaga kamaygani xabar qilingandi.