Қашқадарёда «Дамас» ағдарилди. Унга ёрдам берган икки кишини эса «КамАЗ» босиб кетди

Ўзбекистон 11:52 / 23.02.2021 44611

Қашқадарёда «Дамас» машинаси тонгги қоронғида кўча ўртасида ётган ўйинчоқни четлаб ўтишга уриниб ағдарилиб кетди. Унга ёрдам беришга шошилган икки кишини «КамАЗ» юк машинаси уриб юборди. Оқибатда улар вафот этди. Бу ҳақда Kun.uz’га вилоят ИИБ ахборот хизмати маълум қилди.

Қайд этилишича, ҳодиса 2021 йилнинг 17 феврал куни тонг пайти Самарқанд–Қарши йўлининг Чироқчи тумани «Чорвадор» ҚФЙ ҳудудидан ўтувчи қисмида содир бўлган. «Дамас» машинаси Қаршидан Самарқандга қараб ҳаракатланиб кетаётганда ҳайдовчи йўлда номаълум жисмни кўради. Уни босиб кетмаслик учун айланиб ўтаётганда «Дамас» ағдарилиб кетади.

Шундан сўнг машинадаги ҳайдовчи ва йўловчига ёрдам бериш мақсадида бошқа ўткинчилар тўхтайди. «Дамас»дан ҳайдовчи ва йўловчилар чиқариб олинади. Кўплашиб «Дамас»ни тиклаб қўйишади. Шу пайт, соат 6:20 ларда ушбу йўлдан тез ҳаракатланиб келган «КамАЗ» «Дамас»га ёрдам берган одамлардан икки нафарини уриб кетади. Оқибатда улардан бири воқеа жойида, иккинчиси шифохонада вафот этади.

«Дамас» ҳайдовчиси ва гувоҳларнинг сўзларига кўра, улар ағдарилган машинани тиклаб, йўл четига ўтказаётган пайтда юк машинаси узоқдан тезликни пасайтирмай ҳаракатланишда давом этган. Улар қўл ҳаракати билан «КамАЗ» ҳайдовчисига ишора қилганида, у эътиборсиз қолдирган.

ЙҲХБ ходимлари томонидан мазкур йўл-транспорт ҳодисаси ўрганилганда ўша куни «КамАЗ»га меъёрдан ортиқ юк ортилгани, натижада ҳайдовчи машинани тўхтата олмагани аниқланган.

Маълумот учун, Самарқанд–Қарши йўлининг Чироқчи туман ҳудудидан Қарши шаҳригача бўлган қисми ҳайдовчилар учун хавфли йўллардан бири ҳисобланади. Бу ерда тез-тез оғир оқибатларга олиб келувчи йўл-транспорт ҳодисалари рўй бериб туради.

Кўпроқ янгиликлар