Фавқулодда вазиятлар вазирлиги фуқаролардан электр ускуналари ҳамда иситиш печларидан фойдаланишда хавфсизлик қоидаларига риоя этишни сўради. Бу ҳақда вазирлик хабарида айтилган.
Гидрометеорология хизмати хабарига кўра, 2021 йил 23 февраль кунидан 26 февраль кунига қадар республика ҳудудида ҳаво ҳарорати кечаси 10-15, кундузи 7-12 даража совуқ бўлиши кутилмоқда. Шамол тезлиги 25-28 м/с гача кучайиши мумкин.
“Шу муносабат билан Фавқулодда вазиятлар вазирлиги фуқароларимиздан иш ва яшаш жойида электр ускуналари ҳамда иситиш печларидан фойдаланишда хавфсизлик қоидаларига риоя этишни сўрайди”, - дейилади ФВВ маълумотида.
Аввалроқ, Ўзбекистонга совуқ ҳаво оқими кириб келиши, мамлакат шимолида ҳарорат 22 даража совуқ бўлиши кутилаётгани хабар берилганди.
