SpaceX ва Tesla компаниялари асосчиси Илон Маск маймун миясига чип ўрнатилганини маълум қилди. Бу ҳақда Bloomberg ёзмоқда.
Маск ўзининг Neuralink компанияси ўтказган муваффақиятли тажриба ҳақида маълум қилган. Унинг айтишича, компанияда миясига имплант ўрнатилган маймун пайдо бўлган.
«У мияси ёрдамида видеоўйинлар ўйнай олади», — дея аниқлик киритган Маск.
Тадбиркорнинг сўзларига кўра, чип маймунга ҳеч қандай озор бермайдиган тарзда тери ичига ўрнатилган.
У яқин ойларда миясига чип ўрнатилган маймунлар тасвирланган видеолавҳаларни тақдим этишга ваъда берган.
Маск ўтган йил августида Neuralink компанияси мутахассислари чўчқалар миясига чип ўрнатишганини маълум қилганди. Олимлар чип ёрдамида симсиз алоқа орқали чўчқа миясидаги сезги марказларининг фаоллигини кузатишган.
