Tesla kompaniyasi o‘z tarixida birinchi marta yillik sof daromadga erishganini ma'lum qildi. 2020 yil yakunlariga ko‘ra, sof daromad 721 mln dollarni tashkil etgan. Kompaniya avvalgi yilni 862 mln dollar zarar bilan yakunlagandi.

Ma'lum qilinishicha, to‘rtinchi chorakda xarajatlar ko‘payishi va Model S hamda Model X modellarini yangilashga tayyorgarlik ko‘rilgani sababli daromad o‘sishi pasaygan.

Tesla o‘tgan yili 500 ming dona avtomobil sotish maqsadiga deyarli erishdi. Yil yakunlariga ko‘ra, kompaniya 499 ming 550 dona avtomobil sotgan.

Kompaniya daromadi Xitoyda elektromobillarga bo‘lgan talabning oshishi evaziga o‘sgan. Tesla 2019 yildan buyon Shanhaydagi zavodida elektromobillar ishlab chiqarmoqda.

Xabar qilinishicha, Shanhaydagi zavodda yiliga 450 ming dona Model 3 va Model Y elektromobillari ishlab chiqariladi.