«ХХ аср Ибн Синоси» – Самарқанд давлат тиббиёт институтида Ислом Зокиров фаолиятига бағишланган халқаро анжуман ўтказилди

Ўзбекистон 10:29 / 22.01.2021 7119

Самарқандда ўтказилган халқаро илмий-амалий конференцияда Шаржа тиббиёт университети (БАА), Исроил тиббиёт университети, Россия Федерациясининг Н.И.Пирогов номидаги тиббиёт илмий-тадқиқот университети, Россия халқлар дўстлиги университети, Астрахан давлат тиббиёт университети, Кемерово давлат тиббиёт университетлари, Украинанинг Миллий тиббиёт университети (Одесса), Тернопол миллий тиббиёт университети, Қозоғистон, Тожикистон ва Ўзбекистоннинг барча олий тиббиёт ўқув юртлари профессор-ўқитувчилари иштирок этишди.

Анжуманда буюк шифокор, педагог олимнинг ҳаёт йўли, илмий мероси, акушерлик-гинекология бўйича яратган илмий мактаби, аёллар ва болалар соғлиғини асраш бўйича эришилган ютуқлар, замонавий акушерлик ва гинекологиянинг долзарб масалалари муҳокама этилди.

Конференцияда Ўзбекистон соғлиқни сақлаш вазири ўринбосари Элмира Боситхонова, Ўзбекистон ва Россия фанлар академиясининг академиги Шавкат Каримов, Туркиянинг Соғлиқ билимлари университети ректори, профессор Jevdat Erdol, Приволжск тадқиқот тиббиёт университети ректори Николай Карякин, Украинанинг Тернопол миллий тиббиёт университети ректори Михаил Корда, Қозоқ миллий тиббиёт университети ректори Талгат Нургожин, Тожикистон давлат тиббиёт университети ректори Маҳмудшоҳ Гулзода, СамДТИ ректори Жасур Ризаев, шунингдек, бир қатор жаҳон илмий муассасалари ва хусусий клиникалар раҳбарлари сўзга чиқдилар.

Ялпи мажлисда академик И.Зокировнинг шарафли ҳаёт йўли, серқирра фаолияти, республикамизда оналик ва болаликни ҳимоя қилиш бўйича амалга оширган ишлари, илмий мактаби (80 дан ортиқ фан номзодлари ва докторларига раҳбарлик қилган), замонавий акушерлик ва гинекологиянинг бир қатор долзарб масалалари ҳақида маърузалар эшитилди. Конференция «Оналар ва болалар соғлиғини сақлаш – замонавий тиббиётнинг устувор йўналиши», «Гинекологик амалиётнинг долзарб масалалари», «Перинатал тиббиётнинг долзарб масалалари», «Акушерлик ва гинекологияда шошилинч ҳолатлар» каби шуъбаларда давом эттирилиб, уларда 80 дан ортиқ долзарб маърузалар қилинди.

Халқаро конференцияда анжуман илмий ишларини ўзида мужассам этган СамДТИда нашр қилинадиган «Биология ва тиббиёт муаммолари» халқаро журналининг навбатдаги сони ва академик И.З.Зокировнинг «Танланган илмий асарлари» китобининг тақдимоти ҳам ўтказилди.

Мазкур халқаро илмий-амалий конференция шубҳасиз республикамиз тиббиётида авлодлараро илмий меросни асраш, тиббиёт соҳасини энг замонавий илмий ютуқлар билан бойитиш, малакали тиббиёт кадрларини тарбиялаш, тиббиёт олийгоҳларини чет эл университетлари ва илмий-тадқиқот муассасалари билан муносабатларини янада мустаҳкамлашга хизмат қилади.

СамДТИ ахборот хизмати.

Кўпроқ янгиликлар