Нидерландия парламенти вақтинчалик ҳукуматнинг мамлакатда коронавирус пандемияси ортида комендантлик соати киритиш таклифини кўпчилик овоз билан қўллаб-қувватлади. Ушбу чора 23 январдан кучга киради.

Комендантлик соати соат 21дан 04.30гача амал қилади. Бу вақт ичида одамларга фақат ўта зарур ҳолларда кўчада ҳаракатланишга рухсат берилади. Эътиборлиси, мамлакатда комендантлик соати Иккинчи жаҳон урушидан кейин биринчи марта киритилмоқда.

“Ишга йўл олаётганлар ёки ишдан қайтаётганлар иш берувчи томонидан берилган махсус рухсатномага эга бўлишлари лозим. Итларни сайр қилдиришга рухсат берилади. Тунги вақт шошилинч ёрдам ҳамда озиқ-овқатлар ва таомларни уйга етказиш хизматлари ўз ишини давом эттира олади”, дейилган хабарда. 

Комендантлик соатини бузганларга 95 евро миқдорида жарима солиш кўзда тутилган.

Охирги маълумотларга кўра, Нидерландияда коронавирусга чалинганлар сони 932 мингдан ошиб кетди, 13,3 мингдан кўпроқ киши вирус қурбони бўлган.  

Мамлакатда коронавирус тарқалишини тўхтатиш учун 2020 йил декабр ўртасидан карантин киритилган. Унинг доирасида озиқ-овқат ва биринчи эҳтиёж маҳсулотлари дўконларидан ташқари барча дўконлар, тренажёр заллари ва маданий-кўнгилочар муассасалар ёпилган.

Нидерландияда охирги ҳафталарда коронавирусга чалиниш ҳолатлари камайганига қарамай, ҳукумат коронавируснинг юқумлироқ янги штаммлари тарқалиши олдини олиш учун қўшимча чоралар кўришга қарор қилган.