«BCT Cluster» пахта-тўқимачилик кластери – Ўзбекистонда энг биринчи тузилганлардан. У 2017 йил 19 майдаги президент қарорига асосан ташкил этилган.
Президент матбуот хизмати хабарига кўра, кластер пахта етиштиришдан тортиб, уни чуқур қайта ишлашгача бўлган барча технологик жараёнларни ўзлаштирган. Ромитан туманидаги 8 минг гектар майдонда пахта етиштирилса, унинг толасидан ип йигириш, калавани бўяш, мато тўқиш ва кийим тикиш йўлга қўйилган.
«Bukhara Cotton Textile» корхонаси – ушбу ишлаб чиқариш занжирининг охирги халқаси ҳисобланади. Уни ташкил этиш учун 65 миллион доллардан зиёд инвестиция йўналтирилган.
Давлат раҳбари корхонадаги иш жараёнини, маҳсулотлар сифатини кўздан кечирди.
«Жинси матолар ва маҳсулотлар чиқариш бўйича энг илғор давлатлар билан рақобат қилиш мумкин. Чунки еримиз, сувимиз, пахтамиз ўзимизники. Ишлайман деган ёшларимиз кўп. Таннархни яна пасайтирса бўлади. Лекин сифати халқаро даражада бўлса, дунёда албатта ўз ўрнини топади», – деди Шавкат Мирзиёев.
Мазкур тўқимачилик корхонасида 1500 нафар, кластер билан қўшиб ҳисоблаганда 6000 нафар ходим фаолият юритмоқда.
Кластер 2020 йилда 8,2 миллион долларлик маҳсулот экспорт қилган. Ўзбекистоннинг элчихоналари кўмагида чет элларда савдо нуқталари ташкил этиш режалаштирилмоқда. Дастлабки ҳисоб-китобларга кўра, бу орқали йилига ўртача 50-60 миллион доллар миқдорида валюта тушумига эришиш мумкин.
Корхонада ишлаб чиқарилаётган жинси матолари рангининг табиийлиги билан ҳам ички ва ташқи бозорда устунликка эга. Бунинг учун чет элдан индигофера ўсимлиги уруғи олиб келиниб, 80 гектар майдонда етиштирилмоқда.
Президент маҳсулотлар турини кўпайтириш, дунёга машҳур брендлар билан ҳамкорликда кийимлар ишлаб чиқариш зарурлигини таъкидлади.
Шу ерда 2021–2022 йилларга мўлжалланган Бухоро вилоятида амалга ошириладиган инвестиция лойиҳалари, ёшлар бандлигини таъминлаш режалари тақдимоти ўтказилди.
«Халқ ичида юриб, ҳар бир ёшнинг муаммосини эшитиб, назоратга олиб, охир оқибат ҳал этиб берсак, вазият ўзгаради. Ёшлар ишлари агентлигининг асосий вазифаси шу бўлиши керак», – деди Мирзиёев.
Ёшларни касбга йўналтириш, тадбиркорликка ўқитиш, бизнеси ва ҳунармандчилигини очишга кўмаклашиб, бандлигини ошириш чоралари муҳокама қилинди.
