Ta'kidlanishicha, samolyot pandemiya sharoitida reyslar soni kamayib ketgani sababli 2020 yilning 23 martidan 19 dekabrigacha uchmagan va mutaxassislarning fikricha, unda shu bilan bog‘liq texnik muammolar yuzaga kelgan bo‘lishi mumkin. 
        
“Hozirda bunday samolyotlarni foydalanishga qaytarish bilan bog‘liq jiddiy muammo paydo bo‘lmoqda, chunki ular 9-10 oylab bekor turgan. Samolyotlar uchib turishi lozim, yo‘qsa ularning texnik holati yomonlashadi”, deb aytgan aviatsiya xavfsizligi sohasida faoliyat yurituvchi konsalting kompaniyasi rahbari Xyu Richi.

Uning ta'kidlashicha, uzoq vaqt bekor turgan samolyotlar barcha tizimlarining 2 haftalik sinchkov texnik ko‘rikdan o‘tkazilishini talab qiladi. Ekspertning ta'kidlashicha, Boeing 737–524 samolyoti halokatga uchragani va uzoq vaqt bekor turgani haqidagi ma'lumotlardan keyin uning xayoliga kelgan birinchi savol samolyot foydalanishga qaytarilishidan oldin yaxshilab tekshirilgani yoki yo‘qligi haqida bo‘lgan. “Chunki bunda muammolar ba'zida darhol kuzatilmay, balki qandaydir fursatdan keyin yuzaga chiqadi”, deb aytgan Richi.

Mutaxassislarning ta'kidlashicha, uzoq vaqt parvozlarsiz qolgan uchuvchilarga ham ishga qaytishdan oldin muayyan tayyorgarlikdan o‘tish zarur. 

Hozircha samolyot halokatining aniq sabablari o‘rganilmagan va tergov ishlari davom etmoqda.

Samolyot 9 yanvarda Jakartadan Pontianakka reys bajarayotganda halokatga uchragandi. Uning bortida bo‘lgan barcha 62 kishi halok bo‘lgan. Samolyotning bo‘laklari va qora qutisi Yava dengizida aniqlangan.