Японияда 7 февралгача хорижликларнинг мамлакатга киритилиши тақиқланди

Жаҳон 22:10 / 13.01.2021 1826

Япония ҳукумати коронавирус тарқалишини тўхтатиш учун 7 февралгача мамлакатга барча норезидент хорижликлар, жумладан тадбиркорларнинг киритилишини тақиқлади. Бунгача 11 давлат, Хитой, Жанубий Корея, Таиланд, Ветнам, Сингапур ва Малайзия тадбикорларига Японияга киришга рухсат берилганди. 

Бироқ Япония ҳукумати коронавирусга чалиниш ҳолатлари кўпаяётгани сабабли ишбилармонлик сафарлари ҳақидаги келишувнинг амал қилишини тўхтатишга қарор қилган.

“Биз бундай тоифадаги визаларнинг фавқулодда вазият режими тугамагунгача, яъни 7 февралгача берилишини тўхтатдик”, деб маълум қилган Япония бош вазири Ёсихидэ Суга.

Суга, шунингдек, фавқулодда вазият режими яна 7та префектурага жорий қилинишини маълум қилган. Эндиликда ушбу режим Япония аҳолисининг ярмидан кўпроғи яшайдиган 11та префектурани қамраб олади. Фавқулодда вазият амал қилиши вақтида фуқароларга соат 20дан кейин уйларида қолиш тавсия қилинган. Шунингдек, ресторан ва барлар ҳам соат 20да ёпилади. Бундан ташқари, компаниялар ходимларининг 70 фоизи масофадан ишлашга ўтказилиши белгиланган.  

Декабрда Япония ҳукумати мамлакатга кўплаб давлатлар фуқароларининг киритилишини тақиқлаганди. Ушбу қарор Кунчиқар давлатда коронавируснинг Британияда тарқалган юқумлироқ штамми аниқлангани сабабли қабул қилинган.

Японияда коронавирусга чалиниш ҳолатлари кўпайгани сабабли 7 январдан Токио ва унга ёндош Канагава, Сайтама ва Тиба префектураларида бир ойга фавқулодда вазият режими киритилганди.

Кўпроқ янгиликлар