“Toshkent shahrida Sankt-Peterburg davlat universiteti Federal davlat budjeti oliy ta'lim muassasasi filiali faoliyatini tashkil etish to‘g‘risida”gi prezident qarori qabul qilindi. 

Qarorda belgilanishicha, filial ta'lim faoliyatini 2021/2022 o‘quv yilidan boshlaydi. Bu yerda o‘qish hozircha kunduzgi, keyinchalik sirtqi va boshqa ta'lim shaklida, ta'lim jarayoni rus tilida, keyinchalik boshqa tillarda olib boriladi.

Ushbu OTM bitiruvchilariga O‘zbekistonda oliy ma'lumot to‘g‘risidagi hujjat sifatida tan olinadigan, universitetning belgilangan namunasidagi diplomi beriladi.

Filialga talabalarni o‘qishga qabul qilish davlat granti hamda to‘lov-kontrakt asosida amalga oshiriladi. Bunda, davlat granti asosida ta'lim olgan filial bitiruvchilari uch yildan kam bo‘lmagan muddatga majburiy ishlab berish sharti bilan O‘zbekiston davlat organlari va tashkilotlariga taqsimlanadi.

Qarorga asosan filialda bakalavriat va magistratura bosqichlarida filologiya, mamlakatshunoslik va xorijiy mamlakatlar iqtisodiyoti, biotibbiyot yo‘nalishlarida kadrlar tayyorlanadi.

Filialga Toshkent davlat sharqshunoslik universitetining Toshkent shahar Mirobod tumani, Shahrisabz ko‘chasi, 16-uy manzilida joylashgan bino ajratiladi.