“Тошкент шаҳрида Санкт-Петербург давлат университети Федерал давлат бюджети олий таълим муассасаси филиали фаолиятини ташкил этиш тўғрисида”ги президент қарори қабул қилинди. 

Қарорда белгиланишича, филиал таълим фаолиятини 2021/2022 ўқув йилидан бошлайди. Бу ерда ўқиш ҳозирча кундузги, кейинчалик сиртқи ва бошқа таълим шаклида, таълим жараёни рус тилида, кейинчалик бошқа тилларда олиб борилади.

Ушбу ОТМ битирувчиларига Ўзбекистонда олий маълумот тўғрисидаги ҳужжат сифатида тан олинадиган, университетнинг белгиланган намунасидаги дипломи берилади.

Филиалга талабаларни ўқишга қабул қилиш давлат гранти ҳамда тўлов-контракт асосида амалга оширилади. Бунда, давлат гранти асосида таълим олган филиал битирувчилари уч йилдан кам бўлмаган муддатга мажбурий ишлаб бериш шарти билан Ўзбекистон давлат органлари ва ташкилотларига тақсимланади.

Қарорга асосан филиалда бакалавриат ва магистратура босқичларида филология, мамлакатшунослик ва хорижий мамлакатлар иқтисодиёти, биотиббиёт йўналишларида кадрлар тайёрланади.

Филиалга Тошкент давлат шарқшунослик университетининг Тошкент шаҳар Миробод тумани, Шаҳрисабз кўчаси, 16-уй манзилида жойлашган бино ажратилади.