Марказий банкда Киберхавфсизлик маркази ташкил этилади. Унинг асосий вазифалари маълум қилинди

Ўзбекистон 15:10 / 13.01.2021 1560

Марказий банк раиси ўринбосари Бекзод Ҳамроев 11 январ куни АОКАда ўтган матбуот анжуманида молиявий фирибгарликларга қарши таъсир чораларини кўриш мақсадида Марказий банк таркибида Киберхавфсизлик маркази ташкил этилишини маълум қилган, деб хабар бермоқда Kun.uz мухбири.

«Банк тизимида ахборот тизимларини киберҳужумлардан ҳимоя қилиш мақсадида Марказий банк қошида молия соҳасидаги Киберхавфсизлик маркази ташкил қилинади», – деган у.

Марказий банк ахборот хизмати Kun.uz’га маълум қилишича, марказнинг асосий вазифаси – банк ва молия-кредит соҳасида ахборот ва киберхавфсизлик таҳдидларининг олдини олиш ҳамда молиявий фирибгарликларга қарши таъсир чораларини кўриш.

Таъкидланишича, ушбу марказ банк тизимида ахборот ва киберхавфсизлик ҳамда молиявий фирибгарлик билан боғлиқ нохуш ҳодисаларнинг олдини олиш, уларга қарши таъсир чораларини кўриш, юзага келган оқибатларни бартараф этишни назорат қилиш, банк ахборот тизимларини киберҳужумлардан ҳимоя қилинганлик ҳолатини ва уларнинг узлуксиз ишлашини мониторинг қилиш каби ишларни амалга оширади.

Ўзбекистон бош вазири Абдулла Арипов 2019 йили Москвада ўтган «Очиқ инновациялар» халқаро форумида Ўзбекистонда ҳам бошқа давлатларда бўлгани каби киберҳужумлар сони ортиб бораётгани ҳақида маълумот берганди. 

Ўзбекистон Киберхавфсизлик маркази маълумотига кўра, 2020 йил карантин шароитида интернет хизматлар ва онлайн режимда ишлаш оммалашиб борди, бу эса интернет имкониятларидан фойдаланган ҳолда содир этилган фирибгарликлар сони ошишига сабаб бўлган.

Кўпроқ янгиликлар