Лицензия шартномасини тузиш институти бекор қилинади

Жамият 19:40 / 13.01.2021 1631

Олий Мажлис Қонунчилик палатасининг навбатдаги мажлисида депутатлар «Лицензиялаш, рухсат бериш ва хабардор этиш тартиб-таомиллари тўғрисида»ги қонун лойиҳасини кўриб чиқишди.

Мазкур лойиҳада лицензияланадиган фаолият турлари ва рухсат этиш хусусиятига эга ҳужжатларни кескин қисқартириш назарда тутилмоқда.

Қонун лойиҳасига кўра, лицензиялаш, рухсат бериш ва хабардор қилиш тартиб-таомилларидан ўтиш фақатгина электрон тарзда ихтисослаштирилган махсус электрон тизим — «Лицензия» ахборот тизими, шунингдек, Ягона интерактив давлат хизматлари портали орқали амалга оширилади.

Қонун лойиҳасида лицензия ва рухсат этиш хусусиятига эга ҳужжатлар электрон шаклда берилиши муносабати билан уларнинг дубликатини бериш, шунингдек, лицензия шартномасини тузиш институтини бекор қилиш назарда тутилмоқда.

Шунингдек, талабгорларнинг лицензия ҳамда рухсат этиш хусусиятига эга ҳужжатни бериш тўғрисидаги мурожаатини кўриб чиқишнинг соддалаштирилган тартиби назарда тутиляпти. Хусусан, қонун лойиҳасида белгиланаётган муддат мобайнида ваколатли орган тегишли қарор қабул қилмаганда, талабгор белгиланган давлат божи ёки йиғим тўловини амалга оширгандан кейин махсус электрон тизим унга лицензия ва рухсат этиш хусусиятига эга ҳужжатни бериши шарт ва бунда талабгор фаолият билан лицензиясиз ва рухсат этиш хусусиятига эга ҳужжатсиз шуғулланганлик учун жавобгарликка тортилиши мумкин эмас.

Бундан ташқари, қонун лойиҳасида лицензиялаш, рухсат бериш ва хабардор этишга оид ҳуқуқбузарлик учун юридик шахсларларга ниcбатан жарима қўллаш институтини жорий этиш ҳам назарда тутилган. Бунда юридик шахс жаримани бир ой давомида ихтиёрий тўлаган, шунингдек, амалга ошириш учун талаб этиладиган лицензия, рухсат этиш хусусиятига эга ҳужжатни бериш тўғрисида мурожаат қилган ҳамда хабарнома юборганда, тайинланган жарима миқдорининг 70 фоизи ундирилишига оид рағбатлантирувчи норма белгиланмоқда.

Қонун лойиҳаси депутатлар томонидан биринчи ўқишда қабул қилинди.

Кўпроқ янгиликлар