Majlisda O‘zbekiston Respublikasining ayrim qonun hujjatlariga, xususan, Havo kodeksiga o‘zgartish va qo‘shimchalar kiritish masalasi haqida fikr-mulohazalar tinglandi.

Transport vaziri vazifasini bajaruvchi Ilhom Mahkamov ta'kidlashicha, qonun loyihasining asosiy maqsadi Transport vazirligi va ushbu vazirlik huzuridagi Fuqaro aviatsiyasi agentligi vakolatlarini aniq belgilash, eksperimental havo kemalarini hisobga olish tartibini o‘rnatish bo‘yicha vakolatli organni aniqlash, shuningdek, tegishli farmonlar ijrosini ta'minlashga qaratilgan.

Mazkur loyiha eksperimental havo kemalarini hisobga olish tartibini o‘rnatish bo‘yicha vakolatli organni nazarda tutadi, shoshilinch tibbiy yordam, qutqaruv operatsiyalari, vazirliklar va idoralarning aviatsiya potensialidan huquqni muhofaza qilish va xavfsizlik manfaatlarida foydalanish, quruqlikdagi transport harakatini monitoring qilish, turizm sohasi va biznes ehtiyojlarini qondirish uchun aholi punktlari ustidan parvozlarni amalga oshirish imkoniyatini qonuniy ravishda belgilaydi.

Deputatlar fuqaro aviatsiyasi sohasida loyihaning ahamiyati haqida fikr bildirishdi va qonun loyihasi qabul qilindi.